عه‌فرین .. دوو ته‌قین چێبوون
آرك نيوز .. دوو ته‌قین ل ناڤه‌ندا باژارێ عه‌فرینا رۆژئاڤایێ كوردستانێ چێبوو د ئه‌نجامێ ده هژماره‌ك ژ چه‌كدار د ناڤبه‌را كوشتی و برینداران كه‌تن و ره‌وشه‌ك ته‌ڤلیهه‌ڤیێ د ناڤبه‌را سڤیلان ده دروست بوو .
ل گۆر ژێده‌رێن خوه‌جهی ژ ناڤه‌ندا باژارێ عه‌فرینێ راگهاندنه كو دوه 7/4/2019ان دو ته‌قین روودان يه‌ك ل ل تاخا رۆژئاڤا ل دوارا ماراتێ روودا و هژماره‌ك چه‌كدار هاتن كوشتن و بریندار بوون هه‌روه‌ها ته‌قینه‌ك ل تاخا ئه‌شه‌رفیێ ل سه‌ر رێا باسووتێ چێبوو و زیانێن مادی گهشتن جهێ ته‌قینه‌ێ نه‌خاسم مال وملكێن وه‌لاتیێن سڤیل راستی رووخاندن و هه‌رفاندنێ هاتن .
ژ ئالیێ خوه ڤه ئۆده‌یا هێرسا زیتوونێ كو سه‌ر ب پارتیا یه‌كیتیا ده‌مقراتیك په‌یه‌دێ ڤه ل سه‌ر مالپه‌را خوه یا فه‌رمی ته‌قینا دوارا ماراتێ ل خوه گرت و به‌لاڤ كر كو ته‌قینا دوارا ماراتێ ئۆپه‌راسیۆنه‌ك ل دژی ناڤه‌ندا باره‌گه‌هه‌ك چه‌كدارێن شه‌رقیه هاتبوو پێكئانین د ئه‌نجامێ ل گۆر وێ ئۆده‌یێ كو 5 چه‌كدارێن شرقیه هاتنه كوشتن و هژماره‌ك بریندار بوونه .
ل ئالییه‌كێ دن رووپه‌لێن خوه‌جهی ل سه‌ر تۆرێن جڤاكی به‌لاڤكرنه كو هوركولیێن ته‌قینا تاخا ئه‌شره‌فیێ ئه‌و بوو كو چه‌كداره‌كی دخوه‌ست ماینه‌كێ بچینه داكو بته‌قه لێ ماین د وی ته‌قیي‌ا و د ئه‌نجامێ ئه‌و ته‌قین روودا .
هه‌مان رووپه‌لێن خوجهی دانه زانین كو تاواتبارێ كو ب وێ كارێ رابوویه ئه‌فسه‌ره‌كی جوودابووی ژ ته‌رۆریستێن داعشێ ب ناڤێ عبدالمنعم الزغبی ژ ده‌ردۆرا باژارۆكێ رستن یێ پارێزگه‌ها حمسێ بوو و ژ به‌ریا 8 هه‌یڤان به‌رێ خوه دابوو عه‌فرینێ و ل تاخا ئه‌شه‌رفیێ كارێ فرۆتنا جل وبه‌رك و كه‌نجێن بكارهاتی دكر .
ل هه‌رێما عه‌فرینێ و ب تایبه‌ت ل ناڤه‌ندا باژێر ته‌قینێن ته‌رۆری رووددن و د ئه‌نجامێ كه‌سێن هه‌ری زێده راستی زیان وده‌ردان تێن وه‌لاتیێن سڤیلن كو ته‌قینا هه‌ری ب زیان یا سوق الهال عه‌فرینێ د 16 به‌رچله 2018 روودا بوو د ئه‌نجامێ ب ده‌هان وه‌لاتیێن كورد شه‌هید بوون و هژماره‌ك بریندا بوون و هه‌روه‌ها ته‌قینا ماینه‌كێ د باصه‌كه ڤه‌گوهه‌ستنا ناڤخویی ده د 20 مه‌ها چله ده 2019 د یه‌كه‌م سالڤه‌گه‌را كاره‌سه‌تا عه‌فرینێ ده هژماره‌ك شه‌هیدێن كورد بوونه قوربانییا وێ ته‌قینێ .
پرانییا ته‌قینان ئۆده‌یا هێرسا زه‌یتونێ یا سه‌ر ب په‌یه‌دێ ڤه ل خوه دگره لێ تا نها تو كه‌س نزانه ئالیێن راسته‌قینه یێن ل پاش وان ته‌قینان كی نه ب ته‌نێ وه‌لاتیێن عه‌فرینێ دبێژن پرانییا وان ته‌قینان گرووپێن چه‌كدار ب خوه ب وێ كارێ رادبن داكو مانا خوه د عه‌فرینێ ده بچه‌سپینن وببێژن كو هین ره‌وش نه ئارام پێویستی ب مانا وان هه‌یه هه‌روه‌ها ئه‌و ته‌قین زیانێ دگهینن ره‌وشا عه‌فرینێ یا خراب ودهێلن كو كورد ده‌ست ژ خاكا خوه به‌ردن ژ به‌ر كو ئێدی بوویه باژارێ ساوێران ونه‌ما ژیان تێده دبه .
ش.ع
591
