خەباتكار بەهزاد عیسا كۆچا داویێ كر

خەباتكار و گرتیەكی كورد یێ بەرێ كو د زیندانێن رێژیما ئەسەد دە هاتبو ئشكەنجەكرن و ژ شێوەخستن ژیانا خوە ژ دەست دا

خەباتكار بەهزاد شەمسەدین عیسا خەلكێ گوندێ قاستەپان یێ دەڤەرا ئالیان یا رۆژئاڤایێ كوردستانێ یە ژ دایكبوویێ سالا هەزار و نەهەسد و شێست و سێیانە، دەرچوویێ پەیمانگەها پیشەسازیێ یە، وژبەر كو راستی ئشكەنجەیێ د زیندانێن ریژیما ئەسەد دە هاتبوو ئێدی دەرفەتا زەواجێ ژی ژدەست دابوو.

د رۆژا رێفراندۆما سەرۆكێ رێژیما سووریێ یێ بەرێ حافز ئەلئەسەد دە سالا هەزار و نەهەسەد و نۆت و سێیان، عیسا ب نەخێر دەنگێ خوە دا، و ژ وێ نەخێر و بریارا وی، داوی ل ساغلەمیا وی هات، یەكسەر راستی زیندانێ ژ ئالیێ رێژیمێ ڤە هات و دەردۆرا سالەكێ د زیندانان دە مە، و راستی هەموو جۆرێن ئشكەنجەیێ هات، شكەستن د سەرێ خوە دە زیندانێ دە خوار، و ژبەر وێ یەكێ تەڤلیهەڤی د مەژیێ وی دە چێبوو، هەروەها دەرزیەك لێ دان كو د ئەنجامێ دە نێربوونا خوە ژ دەست دا و ژبەر وێ ئێدی دەرفتا زەواجێ ژی ژدەست دا وبێزەواج و دووندا ما.

عیسا ژ مالباتەكە نشتیمانپەروەر بوو، و د دەستپێكا جوانیا خوە ڤە تەڤلی رێزێن پارتیا دیموقراتا كورد ل سووریێ (ئەلپارتی) بوو، و كار و خەباتا خوە ل دەڤەرا خوە و ل حەسەكێ و شامێ بەردەوام كر، هەروەها د خوەپێشاندانا نەورۆزا سالا هەزار و نەهسەد و هەشتێ و شەشان دە ژی بەشدار بوو كو ل تەنشت شەهیدێ نەورۆزێ سلێمان ئادێ دە د وێ خوەنیشاندانێ دەبوو و بەشداری د مەراسیمێن بخاكسپارتنا ئادێ دە كر.

ژبەر كار و خەبات و زیندانكرنێ، عیسا هەولا كارمەندبوونێ كر، لێ رێژیما ئەسەد هەموو دەرفەتێن كار ل پێش وی گرتن، و مافێ كارمەندبوونێ لسەر وی قەدەغە كر و ئێدی نەچار بوو ژبۆ دەبارەیا ژیانا خوە، كارێ هەسنكاریێ بكە.

پشتی ژیانەكە كوور و داگرتی ژ ئێش و ئازار و ئشكەنجەیێ و نەساغلەمیێ، رۆا پێنجێ نیسانا 2019ان ل گوندێ خوە راستی شۆرتەكە ئلكتریكێ هات وژیانا خوە ژدەست دا، و بخوەرە چیرۆكەكە نشتیمانپەروەری و ستاندنا هەلوەست و وانەیەك لدژی ستەمكاری و دكتاتۆریەتێ رادەستی نفشێن داهاتی كرن

424