پەیەدێ زارۆكەك رەڤاند بوو و ئیرۆ ب شەهید راگهاند

زارۆكەك كورد بەرێ چەكدارێن پەیەدێ رەڤاند بوو ونها ژی دناڤا رێزێن چەكدارێن پەیەدێ دە شەهید كەت.

ئەو زارۆك د پۆلا حەفتان یا خوەندنا خوە دە بوو، دەما چەكدارێن پەیەدێ كو باسكێ پەكەكێ یێ سووریێ یە ئەو رەڤاند، وئیرۆ نووچەیا شەهیدبوونا وی بەلاڤ بوو.

زارۆكێ ب ناڤێ لوند علیكو ، ژ دایكبوویێ 2002، د سالا 2015 دە ل سەر دەستێ رێخستنا پەكەكێ وباسكێ ویێ یێ سووریێ (پەیەدێ) هات رەڤاند. لوند (13) سالی بوو، ل گۆر یاسا وپرەنسیبێن ناڤدەولەتی و هەر ل گۆر یاسایا لەشكەریا نەچار یا پەیەدێ بخوە ژی، تەمەنێ ڤی زارۆكی نا بە ژبۆ لەشكەریا نەچار ، لێ ئەڤ نە زارۆكێ یەكێ و یێ داویێ یە ، ب هەزاران زارۆكێن كوردان ژ كور وكەچان ل سەر دەستێ پەكەكێ وپەیەدێ هاتنە دوور كرن ژ خوەندنا وان و تەڤلی رەفێن پەكەكێ كرنە.

زارۆكێ ب ناڤی لوند ژ باژارێ قامشلۆ بۆ قەندیلێ هات رەڤاندن ، پشتی دەمەكێ ژبۆ پارێزگەها دێرازۆرێ برن و تەڤلی شەر كرن وپشترە نووچەیا شەهیدبوونا وی راگهاندن.

د دەما رەڤاندنا وی دە، بافێ وی یێ نها كۆچا داوی كری، سەردانا بارگەهێن پەیەدێ وپەكەكێ ل سووریێ كربوو، لێ بێ مفا بوو، ئیدی هەر ئەوە بوو چارەنڤیسا لوند، مینا هەزارێن زارۆكێن كوردان یێن كو بدزی هاتنە رەڤاندن ، وپشترە ب ناڤێ شەهید ب سەر مالباتێن وان دە هاتنە ڤەگەراندن.

هەتا نها ژی، چارەنڤیسا گەلەك زارۆكێن كوردان كو هاتنە رەڤاندن ل سەر دەستێن پەكەكێ وباسكێ وێ یێ سووریێ پەیەدێ نە دیارە، گەلەك ژ وان تەڤلی شەر ل رەقایێ، تەپقایێ، دێرازۆرێ و باژارێ منبجێ بوونە، هەمی هەولدانین مالباتێن وان ژبۆ ستاندنا زارۆكێن خوە ژ پەكەكێ بەر ئاڤێتی دبن .

لوند د تەمەنێ خوە یێ 17 سالی دە شەهید كەت، لێ پرسیار هەر ئەو دمینە، كی وكەنگێ وێ ڤێ ریخستنا كو تاوانێن شەر و ل دژی مرۆڤاهیێ دەرهەقێ مللەتێ كوردستانا سووریێ دە دكە و كوردستانا سووریێ ژ خەلكێ وی ڤالا دكە ، دادگەه بكە .

295