ئەمیندارییا گشتی یا ئەنەكەسێ داخویانییەك ژبۆ سەركردە حسێن ایبش دەرخست

ئەمیندارییا گشتی یا ئەنجوومانا نشتیمانی كوردی ل سووریێ "ئەنەكەسێ" دەربارێ گرتنا ئەندامێ كۆمیتا ناڤەندی یا پارتیا دەمۆكراتا كوردستان – سوریا و سەرۆكێ ئەنجوومانا خوەجهی یا ئەنجوومانا نشتیمانیا كوردی ل سووریێ ل هەرێما عەفرینێ" حسێن ایبش ژ ئالیێ چەكدارێن دەستهلاتدار ل عەفرینێ داخویانیەك رۆژا (2.4.2019)، بەلاڤ كر.

د داخویانیا ئەمینداریا گشتی یا ئەنەكەسێ دە وها هاتیە، گرۆپەك چەكدار كو ب ناڤێ پۆلیسێن لەشكەریێ وئەمن سیاسی سەر ب میلیسیایێن چەكدار ل عەفرینێ ڤە تێن ناسكرن، رۆژا (31.3.2019)، ئەندامێ كۆمیتا ناڤەندی یا پارتیا دەمۆكراتا كوردستان – سوریا و سەرۆكێ ئەنجوومانا خوەجهی یا ئەنجوومانا نشتیمانیا كوردی ل سووریێ ل عەفرینێ ، حسێن ایبش ، گرت. وهەتا نها چارەنڤیسا وی نە دیارە .

ئەنەكەسێ د داخویانیا خوە دە داخواز ژ دەولەتا توركیێ كر كو فشارێ بخە سەر میلیسیایێن چەكدار دا كو ڤان بنپێكرن و كریاران ل دەرهەقێ مللەتێ كورد و مال ومولكێن وان ل عەفرینێ راوەستینە و ب ئاوایەك بلەز هەڤال حسێن ایبش ئازاد بكن .

هەروها ژ ئالیێ خوە ڤە ژی، كۆمیتا ناڤەندی یا پارتیا دەمۆكراتا كوردستان – سوریا د داخویانیەك ژبۆ رایا گشتی داخوازا ئازادكرنا هەڤالێ سەركردە حسێن ایبش كر .

د داخویانیا كۆمیتا ناڤەندی دە، وها هاتیە، دیار تشتا كو ل عەفرینێ وگوندەوارێنوێ روو ددن وكریارێن دەرهەقێ مللەتێ عەفرینێ دە تێن كرن ژ ئالیێن كەسێن دەستهلاتدار ب ئاوایەكی نە رەوا وخودان بریار ل عەفرینێ ب پشتەڤانیا حكوومەتا توركیێ، زێدەبارێ ڤان كریاران ، ئەو دەستهلاتدارانە دناڤبەرا دەم ودەمەكێ دە ژی، مللەتێ عەفرینێ دگرە و درەفینە و تایبەتی ژی كەسێن سیاسەتمەتدار وخودان بیروباروەی.

د داخویانیا پارتی دە هاتیە ، هەڤدەمێ ڤێ یەكێ، رۆژا (31.3.2019)، چەكدارێن ل عەفرینێ ئەندامێ كۆمیتا ناڤەندی یا پارتیا دەمۆكراتا كوردستان – سوریا و سەرۆكێ ئەنجوومانا خوەجهی یا ئەنجوومانا نشتیمانیا كوردی ل سووریێ ل عەفرینێ گرت ، كۆمیتا ناڤەندی یا پارتیێ د دەمێ كو بنپێكرن وكریارێن وها یێن كو دگەل سادەترین بنەمایێن مافێن مرۆڤان نا گونجە ب تووندی شەرمەزار دكە ، وخزمەتا پێشەرۆژا دەڤەرێ و خەلكێ وێ ناكە، و د هەمان دەمێ پارتی داخوازێ ژ ئالیێن بەرپرس وپەیوەندیدار دكە ، كو بلەز هەڤالێ سەركردە حسین ایبش وهەمی گرتیێن د زندانێن وان گرۆپێن چەكدار دە ئازاد بكن بەری كو دەم دەرباس ببە وهەلوێستێن گونجاو ڤێ دەربارێدە وەرن ستاندن.

311