ئاڤاكرنا ناڤچەیا ئارام ورۆلا ئەنەكەسە ولەشكەرێ رۆژ

آرك نيوز...هەر چەندە وەلاتێن كو دەستێوەردانێ د سووریێ دە دكن هەول ددن كریزا سووریێ ب گشتی ویا رۆژئاڤایێ كوردستانێ چارەسەربكن , لێ شرۆڤەكارێن سیاسی دبێژن كو ئەو وەلات دخوازن چارەسەریا كریزا سووریێ د بەرژەوەندیا وان دە بە بەری خەلكێ سووریێ , وپێویستە ناڤچەیا ئارام ل رۆژئاڤایێ كوردستانێ د بن سیا جڤاكا ناڤدەولەتی دە وەرە ئاڤاكرن .

محسن تاهر ئەندامێ پۆلیتبیرۆیا پارتیا دیموكراتا كوردستان سوریا د چارچۆڤەیا بەشداریێ د بەرناما جڤات دە كو بریارا ئیشەڤ دەمژمێر هەشتێ شەڤ ل سەر ئاكرانێ ئاركێ وەرە پەخشكرن راگەهاند كو ئەنجوومەنا نشتیمانی یا كورد ل سووریێ بەردەوام شرۆڤەیێ ژ رەوشێ رە دكە , وپێویستە ئەنجوومەنا نشتیمانی یا كورد ل سووریێ دەرئەنجامێن كارێ خوە یێ سیاسی ل سەر عەردێ جه بجه بكە.

وژئالیێ خوەڤە نەواف رەشید سەرۆكێ نوونەراتیا هەرێما كوردستانێ ئەنجوومەنا نشتیمانی یاكورد ل سووریێ راگەهاند : ئەگەر ناڤچەیا ئارام دبن سیا جڤاكا ناڤدەولەتی دە وەرە ئاڤاكرن , وی دەمی مافێن تەڤایا پێكهاتەیێن دەڤەرێ وێ وەرە پاراستن , ژ بەر یەك وەلات نكارە سەرپەرشتیا ناڤچەیا ئارام بكە .

هەروەها حەواس عەگید ئەندامێ دەستەیا دانوستاندكارا سووریێ گۆت كو پەیمان ژ ئالیێ ناڤدەولەتی هاتنە وەرگرتن كو ئەنجوومەنا نشتیمانی یا كورد ل سووریێ د ئاڤاكرنا ناڤچەیا ئارام دە خوەدان رۆل بە , ولەشكەرێ رۆژ وێ بەشەك بە ژ هێزێن پاراستنا ناڤچەیا ئارام .

ژ دەما نووچەیا ئاڤاكرنا ناڤچەیا ئارام ل رۆژئاڤایێ كوردستانێ هاتی راگەهاندن , وهێز وئالیێن سیاسی یێن وێ دەڤەرێ كەتنە لڤ وتەڤگەرێ دە داكو خوە ل گەل ئیستراتیجیەتا ئالیێن ناڤدەولەتی بگونجێنن , وخەلكێ دەڤەرێ ب فكار چاڤەریا پێشەرۆژا خوە دكن .
ز.ح

680