ئه‌نجومه‌نا نشتیمانی یا كوردی ل سووریێ داخويانييه‌ك به‌لاڤ كر
آرك نيوز .. ئه‌مينداريا گشتى يا ئه‌نجومه‌نا نشتمانى يا كوردى ل سووريێ ئه‌نه‌كه‌سێ جڤينا خوه يا ئاسايى رۆژا ئينا بوورى بيست وسسيێ مه‌ها يازده‌هان دو هه‌زار و حژده‌ه لدارخست و د وێ جڤينێ ده بريارنه گرنگ ب هێزكرن و پێشخستنا كارێ خوه يێ سياسى و جه‌ماوه‌رى دان
د ده‌ستێكا جڤينا ئه‌نجومه‌نا نشتمانى يا كوردى ل سووريێ ده بيستكه‌ك بێ ده‌نگ ل سه‌ر گينانێ پاك يێ پاكره‌وانێن كورد و كوردستانێ و پاكره‌وانێن شۆره‌شا سووريێ هاته راوه‌ستاندن
پشتره ئه‌مينداريا گشتى يا ئه‌نه‌كه‌سێ ل سه‌ر خالێن كو د ليسته‌يا كارێ وێ ده بوون راوه‌ستيا ،نامه‌يێن ژێره هاتى خوه‌ندن و چالاكيێن ئۆفيسێن ئه‌نجومه‌نێ پێشكێش كرن و هاتن گه‌نگه‌شه‌كرن و بريارنه گرنگ ب هێزكرن و پێشخستنا كارێ خوه يێ سياسى و جه‌ماوه‌رى دا و داخويانيه‌ك ده‌ربارێ جڤينا خوه به‌لاڤ كر
ده‌ربارێ ره‌ووشا سياسى ل كوردستانا سووريێ ، ئه‌مينداريا گشتى يا ئه‌نجومه‌نا نشتمانى يا كوردى ل سه‌ر بنپێكرنێن گرووپێن چه‌كدار يێن ل عه‌فرينێ دمينن ده‌رحه‌قێ وه‌لاتيێن كورد ل عه‌فرينێ و چاوانيا كار ژبۆ سڤكرنا ئێش وئازارێن وه‌لاتيان راوه‌ستيا ،ته‌وانێن وان گرووپێن چه‌كدار ژ كوشن و ده‌سته‌سه‌ركرنا ل سه‌ر مال وملك و به‌رهه‌مێن چاندنيێ ودابه‌شكرنا وان د ناڤبه‌ره خوه ده هه‌ر وه‌ها بجيكرنا ده‌ربده‌رێن باژارێن دن يێن سووريێ و ب تايبه‌ت مالباتێن خوه د مالێن وه‌لاتيێن كورد ده ل عه‌فرينێ و گوهه‌رتنا ده‌موگرافى يا رێبازكرى شه‌رمه‌زار كر و په‌رپرسايه‌تيا وان كرياران ئێخسته ستويێ توركيێ ده و گۆت كو دڤێ توركيێ چاره‌يه‌كێ ژ بنپێكرنێن وان گرووپێن چه‌كدار ره ده‌ينێ و وان ژ عه‌فرينێ ده‌رخه و داخواز ژ جڤاكا ناڤده‌ووله‌تى كر كو ڤه‌گه‌را ده‌ربده‌رێن عه‌فرينێ بۆ عه‌فرينێ دابين بكه و برێڤه‌برنا عه‌فرينێ و ئه‌ووله‌هيا وێ راده‌ستى خوه‌دانێ وێ بكه و پاراستنه‌كه ناڤده‌ووله‌تى ژبۆ وان وه‌ره كرن
ئه‌نه‌كه‌سێ د داخويانيا خوه ده ژ توركيێ خوه‌ست كو گه‌فێن خوه ب ئێريش و ده‌رباسبوونا ده‌ڤه‌رێن كوردى ل كوردستانا سووريێ راوه‌ستينه د هه‌مان ده‌مێ ده و به‌رامبه‌رى وێ ژى ژ په‌يه‌دێ خوه‌ست كو ژ بريارێن گرێداى چاره‌نڤيسا مله‌تێ كورد و پاشه‌رۆژا وى و ته‌ك ئاليبوونا په‌يه‌دێ د وان برياران ده ڤه‌گه‌را و هنجه‌تان نه‌ده توركيێ داكو ده‌رباسى ده‌ڤه‌رێن كوردى ببه
ئه‌نه‌كه‌سێ هه‌ر وه‌ها ته‌كه‌ز كر كو سه‌ربه‌ست به‌ردانا هن گرتيان ژ زندانێ په‌يه‌دێ ناكه‌ڤه جهێ گرتنا دۆسه‌يا گرتيێن سياسى ده ب يه‌ك جارى و نابه وه‌كو سورشته‌كه گونجاوو بۆ دانوستاندنان كو مله‌تێ كورد پێ دل خوه‌ش و رازى به
و داخواز ژ رێخستن و چالاكيێن سياسى ره‌ووشه‌نبيرى و جڤاكى يێن كوردى كر كو هه‌لوێستا خوه يه‌كرێز بكن و رێكه‌فتنێن ب ئه‌نه‌كه‌سێ ره كو ل سه‌ر ئه‌رێكربوون د نه‌رينا چاره‌يا سياسى د سووريێ ده پاشگوه نه‌خن وكار بۆ ئاڤاكرنا سووريه‌كه هه‌ڤگرتى ب سيسته‌مه‌كه ده‌موكراسى په‌رله‌مانى پر نه‌ته‌وو ده‌ستوورا وێ مافێن كوردان يێن نه‌ته‌وى تێده پاراستى و گارانتى كرى به و تێگهاندنا دۆستێن كوردان ب ماێ كوردى د چارچۆڤه‌يا سووريايه‌كه ده‌موكراسى بۆ هه‌مى سووريان به
ئه‌مينداريا گشتى يا ئه‌نجومه‌نا نشتمانى يا كوردى ل سووريێ د داخويانيا خوه ده گۆت كو ئه‌وو ل سه‌ر پرۆسه‌يا سياسى و ب پاشخستنا ئاڤاكرنا كۆميته‌يا ده‌ستوورى كو تا نها نه‌هاتيه ئه‌نجام دان و دانينا كه‌له‌مان ژ ئاليێ رێژيما ئه‌سه‌د ڤه ل پێش وێ راوه‌ستيايه و داخواز ژ نه‌ته‌وێن يه‌كگرتى و وه‌لاتێن پێوه‌نديدار كر كو گاڤنه جدى ده‌ربارێ باڤێژن و كۆميته ئاڤا ببه و ده‌ست ب كارێ خوه بكه ،سه‌ربارى كو ژ ئيتلافا نشتيمانى يا ئۆپۆزيسيۆنا سووريێ خوه‌ست كو پابه‌ندى بلگه‌يا د ناڤبه‌را وان و ئه‌نه‌كه‌سێ ده هاتى ئيمزه‌كرن بن و ژ دۆستێن مله‌تێ كورد و ئۆپۆزيسيۆنێ خوه‌ست كو كورد ب دادوه‌رى جهێ خوه د نوونه‌راتيێ د كۆميته‌يا ده‌ستوورى ده بگرن و پشتا كوردان و دۆزا وان يا نه‌ته‌وى و داوازێن وان يێن ده‌ستوورى بگرن .
ئه‌نه‌كه‌سێ ته‌كه‌ز كر كو چاره‌سه‌ركرنا دۆزا كوردى و مافێ كوردان و دخوازێن ته‌ڤاهيا پێكهاته‌يێن دن ل سووريێ دێ ببه ڤه‌كرنا ده‌رگه‌هێ راسته‌قين بۆ بده‌ستخستنا ده‌موكراسيێ ل سووريێ و خالا هه‌رى سه‌ره‌كه بۆ به‌ستخستنا ئه‌ووله‌هى و ئاراميێ كو وه‌لاتيێن سووريێ و جڤاكا ناڤده‌ووله‌تى وێ يه‌كێ دخوازن
ع.ع
644
