شه‌پێلا پێشه‌رۆژ: کوردستانا سووریێ د مه‌ترسیێ ده یه، ئه‌ڤ ژی هورگولیێن ئاماده‌کاریێن ئێریشێ نه
شه‌پێلا پێشه‌رۆژا کورد ل سووریێ ڕاگهاند کو کوردستانا سووریێ د مه‌ترسیێ ده یه، و ئه‌و مه‌ترسی ل ستوویێ پ ي د/ پ ك ك گرت، و هورگولیێن ئاماده‌کاریێن پێکانینا ئێریشه‌کێ ل سه‌ر ناڤچه‌یێن کوردستانا سووریێ ئه‌شکه‌ره کرن.
د داخویانیه‌کێ ده، شه‌پێلا پێشه‌رۆژ گۆت کو ئه‌و پێشبینی دکن کو هێزێن ئارتێشا ئازاد وێ ب پشته‌ڤانیه‌که ئاسمانی ژ تورکیێ، ئێریشه‌کێ ل سه‌ر ناڤچه‌یێ پێک بینن، و دبێژه ئه‌گه‌ر ئه‌و یه‌ک هات ئه‌نجامدان، پ ي د/ پ ك ك به‌رپرسنن د به‌ر ده، ژ به‌ر کو هه‌بوونا پ ك ك ل کوردستانا سووریێ دهێله تورکیێ پلانا خوه بجی بکه، هه‌روه‌ها چوونا پ ي د بۆ ناڤچه‌یێن عه‌ره‌بی بوو سه‌ده‌م کو کۆمێن عه‌ره‌ب ل دژی کوردان ده‌رکه‌ڤن.
شه‌پێلا پێشه‌رۆژ د داخویانیا خوه ده ئه‌شکه‌ره دکه کو ڕۆژا ۱/۱۱/۲۰۱۸ ، تورکیێ هه‌موو سه‌رکرده‌یێن گرووپێن چه‌کدار یێن ژ ڕۆژهلاتێ سووریێ ئاگاهدار کرن کو خوه ژ بۆ شه‌ره‌کی ل کوردستانا سووریێ ئاماده بکن، گرووپا ئه‌حرار ئه‌لشه‌رقیێ وێ سه‌رکردایه‌تیا وی ئه‌رکی ڕابه.
ڕۆژا ۲/۱۱/۲۰۱۸ گرووپێن ته‌جه‌موع ئه‌لعه‌دل، ته‌جه‌موع شوهه‌داء ئه‌لحه‌سه‌کێ و ته‌جه‌موع ئه‌حرار ئه‌لمه‌سکه‌نه ته‌ڤلی گرووپا ئه‌حرار ئه‌لشه‌رقیێ ب تمامی بوون.
شه‌پێلا پێشه‌رۆژ دبێژه تێ پێشبینیکرن کو کۆمێن فه‌یله‌ق ئه‌لشام و فرقه‌ت ئه‌لشام و فرقه‌ت ئه‌لسولتان موراد و ته‌جه‌موع ئه‌حرار ئه‌لشه‌رقیه، ب ڕێیا ده‌رگه‌هێ ئه‌لراعی یێ سینۆری ده‌رباسی تورکیێ ببن، و ژ ور بۆ سینۆرێ سووریێ ژ ئالیێ باژارێ ئۆرفایێ ڤه وه‌رن ڤه‌گوهه‌ستن و ژ ور به‌ره‌یه‌که شه‌ر ل سه‌ر کوردستانا سووریێ ڤه‌کن، گرووپێن دن وێ ژ عه‌فرین، ئعزاز و بابێ به‌ره‌ڤ منبج و گرێ سپی بلڤن.
شه‌پێلا پێشه‌رۆژ هه‌روه‌ها دبێژه گرووپێن ئه‌حرار و شوهه‌داء تل ڕفعه‌ت و ئه‌نجومه‌نا له‌شکه‌ری یا مارعێ و ئارتێشا ئه‌لشه‌مال، پێکانینا وێ ئێریشێ سه‌ر ناڤچه‌یێن کوردستانا سووریێ ڕه‌د کرنه و دبێژن گه‌ره‌ک ئه‌و ئێریش ته‌نێ ل سه‌ر ناڤچه‌یێن کو ژ ئالیێ هسد ڤه هاتنه داگیرکرن به، واته ناڤچه‌یێن ده‌رڤه‌یێ کوردستانا سووریێ.
شه‌پێلا پێشه‌رۆژ بانگ ل ئه‌نجومه‌نا نشتیمانی یا کوردی ل سووریێ کر کو ب ئه‌رکێ خوه ڕابه و جڤینه‌که ئاوارته ل دار بخه و ڕێیه‌کێ ژ بۆ ڕێگرتن ل به‌ر بجیکرنا وێ پلانێ، ببینه و مه‌ترسیێ ل سه‌ر کوردستانا سووریێ هلینه، هه‌روه‌ها داخوازا ئه‌کتیڤکرنا ڕۆلا پێشمه‌رگه‌یێن ڕۆژ ژ بۆ ڤێ مه‌ترسیێ کر.
492
