ناوەندی رەوەندی كورد لە دەرەوە بانگەوازێك دەربارێ هێرش بردنە سەر ھێزی پێشمەرگە بەلاوكردەوە

آرك نيوز..بەداخەوە ، لەم بارودۆخە هەستیارە ئابووری و تەندروستی و سیاسیەی ناوچەكە بەگشتی و كوردستان بە تایبەتی، گوێ بیستی هەندێ لێدوان و كردەوەی هەڕەشە ئامێز و هێرش بردنە سەر ھێزی پێشمەرگە دەبین ، پێشمەرگە ئەو هێزەی كە ئیستۆرەی تیرۆریستانی داعشی تێکشكاند .

بە نەفەسی نانەوەی گرژی و ناتەبایی نیشتیمانی ، لە لایەن پارتی كرێكارانی كوردستان /پ ك ك ەوە، ئەم جۆرە لێدوان و كردەوانە، جگە لە تێك دانی سەقامگیری هەرێمی كوردستان و دژایەتی دەست كەوتە نیشتیمانی و نەتەوەییەكانی گەلەكەمان ، مەترسیشە بۆ سەر ژیان و گوزەرانی و بژێوی و بەرژەوەندییەكانی هەرێمی كوردستان ، و كاریگەری و دەركەوتەی نەرێنی دەبێت لەناو نێوەندە نێودەوڵەتیەكاندا.

ئێمە لە كاتێك دا پاڵپشتی خۆمان بۆ قەوارەی سیاسی هەرێمی كوردستان و دامەزراوە دەستوری و یاسایەکان و دەست كەوتە نیشتیمانی و نەتەوەییەكانی دەردەبڕین، لە هەمان كاتدا سەركۆنەی هەر كردەوە و دەست درێژیێك دەكەین كە زیان بە بەرژەوەندییە نیشتیمانییەكانمان بگەیێنێت.

داوا لە سەركردایەتی پ ك ك دەكەین كە ڕەچاوی هەستیاری بار و دۆخی باشووری كوردستان و گوزەران و بژێوی خەڵكەكەی بكەن. بۆ ڕێگە گرتن لە زیاتر تێك چوونی بار و دۆخەكە و ڕوونەدانی ڕوداوی نەخوازراوی تر، پێویستە واز لە دەستوەردانی كاروباری حكومەتی هەرێمی كوردستان بهێنن و ڕو لە مەیدانی ڕاستەقینەی چالاكییەكانییان بکەن كە باكووری كوردستانە، با كێشە و ناكۆكییەكان لە ڕێگای دیالۆگ و هەست بە بەرپرسیاریەتی نیشتیمانیەوە چارەسەر بكەن، ئاشتی و تەبایی ناو ماڵی كورد بپارێزن. نابێت بە هیچ شێوە و بیانوویێك ئەزموونی تاڵی شەڕی نەگریسی كورد و كورد دووبارە بكرێتەو . سەردەم سەردەمی دیالۆگ و چارەسەری ئاشتییانەی كێشە و ناكۆكییەكانە .

بژی کورد و کوردستان
سەروەری و ئازادی و ئاشتەوایی بۆ نەتەوەکەمان

321