ماكرۆن: پێناسەیا توركیا ژ تەرۆرێ رە جودایە

آرك نيوز...سەرۆكێ فەرەنسا دبێژە كو توركیا ل دژی هەڤپەیمانێن فەرەنسا ل شەرێ دژی داعشێ راوەستیایە , وپێناسەیا توركیا بۆ تەرۆرێ جودایە .

ئیمانوێل ماكرۆن سەرۆكێ فەرەنسا د چارچۆڤەیا لووتكەیا ناتۆ دە ل گەل دۆنالد ترامپ سەرۆكێ ئەمریكا جڤینا وپشتی جڤینێ راگەهاند كو پێویستە پێناسەیا تەرۆرێ ل جەم وەلاتێن ئەندامێن هەڤپەیمانیا ناتۆ هەڤبەش بە , وتوركیا پێناسەیا وێ ژ بۆ تەرۆرێ جودایە ژ پێناسەیا وەلاتێن ئەندامێن ناتۆ .

هەروەها سەرۆكێ فەرەنسا تەەكەز كر وگۆت كو هینا رێخستنا تەرۆرستی یا داعشێ ب داوی نەهاتیە , وتوركیا هندەك جار پەنا بۆ هندەك گرووپێن نێزیكی داعشێ دبە .

سەرۆكێ فەرەنسا د بەردەوامیا گۆتنا خوەدە گۆت كو هینا ژمارەیەكە مەزن یا چەكدارێن رێخستنا تەرۆرستی یا داعشێ ل عێراق وسووریا مانە , وخوە جارەكە دن رێك دخن .

ودۆنالد ترامپ سەرۆكێ ئەمریكا تەكەزی ل سەر گۆتنا ئیمانوێل ماكرۆن سەرۆكێ فەرەنسا كر وگۆت كو راستە ژمارەیەكە مەزنا چەكدارێن داعشێ هاتنە دەستەسەركرن لێ هینا ژمارەیەكە مەزنا چەكدارێن ئازادن ژی .

د دەمێ كو رەجەب تەیب ئەردوغان سەرۆكێ توركیا , وئیمانوێل ماكرۆن سەرۆكێ فەرەنسا تۆمەتان ئاراستەی هەڤ دكن , وب تووندی بەرسڤا هەڤ ددن , د چارچۆڤەیا لووتكەیا هەڤپەیمانیا ناتۆ دە جڤینەكە چار ئالی ناڤبەرا رەجەب تەیب ئەردوغان سەرۆكێ توركیا , وئیمانوێل ماكرۆن سەرۆكێ فەرەنسا , وئەنجێلا مێركل راوێژكارا ئەلمانی , وبۆریس جۆنسۆن سەرۆك وەزیرێن بەریتانیا هات ل دارخستن , وگۆتووبێژكرنا رەوشا سووریێ ب گشتی ورۆژهلاتێ چەمێ فەراتێ یەك ژ مژارێن سەرەكی بوو د لووتكەیا چار ئالی دە .

دەما كو توركیا ئێریشی هەردو باژارێن سەرێ كانیێ وگرێ سپی كر ئیمانوێل ماكرۆن ب تووندی ئێریشا توركیا شەرمەزاركر , وهەڤپەیمانیا ناتۆ ب مەژی مری پەسنكر , ول هەمبەر دە رەجەب تەیب ئەردوغان بەرسڤ دا وگۆت كو ئیمانوێل ماكرۆن بخوە مەژی مەریە , وگۆتنێن وی بێ سوودن .

366