شاهۆز ئەمین بانگا ئاڤاكرنا باوەریێ ب هەڤپەیمانیا ئۆپۆزسیۆنێ رە دكە
هەڤسەرۆكێ پارتیا یەكیتیا دیموقراتیك پەیەدێ بانگ ل هەڤپەیمانیا نشتیمانی یا ئۆپۆزسیۆنا سووریێ دكە ژبۆ ئاڤاكرنا باوەریێ، بەریا هەر تەڤلیبوونەكە پەیەدێ بۆ دەستەیا دانووسنانكارا سووریێ.
د داخویانیەكە رۆژنامەڤانی دە ئیرۆ، هەڤسەرۆكێ پەیەدێ شاهۆز ئەمین گۆت كو تا نها تو ڤەخوەندنەكە فەرمی ژ ئالیێ دەستەیا دانوستانكارا سووریێ ژبۆ تەڤلیبوون یان كار لژێر سیوانا دەستەیا دانووستاندكار بۆ وان نەهاتیە، و گۆت وان تەنێ ب رێیا راگهاندنیێ بهیستنە كو گەرەك دەستەیا دانوستانكار وەرە بەرفرەهكرن و ئەنجومەنا سووریایا دیموقراتیك یا كو پەیەدێ بەشێ سەرەكە یە ژێ وەرە تەڤلیكرن.
شاهۆز د داخویانیا خوە دە بانگ ل هەڤپەیمانیا نشتیمانی یا ئۆپۆزسیۆنا سووریێ كر كو بەریا هەر تەڤلیبوون یان دانوستاندنێ، پێنگاڤێن ئاڤاكرنا باوەریێ ناڤبەرا پەیەدێ و هەڤپەیمانیا ئۆپۆزسیۆنێ دە وەرن بهێزكرن.
ل سەر ڤێ مژارێ فۆاد عەلیكۆ ئەندامێ كۆمیتەیا سیاسی یا پارتیا یەكیتی یا كوردستانی سووریا ژبۆ ئاركێ راگهاندبوو كو حەتا كو پەیەدێ ژ ئالیێ ئۆپۆزسیۆنێ ڤە وەرە قەبوولكرن دڤی كریارێن خوە لدژی ئەنجومەنا نشتیمانی یا كوردی ل سووریێ راوەستینە و نەرینا خوە دەربارێ هەڤپەیمانیا ئۆپۆزسیۆنێ بگوهەرە، د وێ دەمێ دە ئەنجومەن دكارە رۆلەكێ ناڤبەرا هەڤپەیمانیا ئۆپۆزسیۆنێ و پەیەدێ دە بلیزە.
338
