تەقین و خوەنیشاندان لدژی هسد بەرفرەه دبن

تەقین و خوەنیشاندان لدژی چەكدارێن سووریایا دیموقراتیك كو چەكدارێن پەیەدێ بەشێ سەرەكەنە ژێ بەرفرە دبن نەخاسم ل گوندەوارێ رەقا و حەسەكێ و دێرازۆرێ.

ل گۆری رەوانگەها سووریێ یا مافێ مرۆڤان كو تەقینەك ل گوندێ ئەلسەبحە یێ گوندەوارێ رۆژهلاتێ دێرازۆرێ ب رێیا بۆمبەیەكە چاندی هات ئەنجامدان كو ئارمانجا كاروانەكە بارهلگرێن سۆتەمەنیێ یێن چەكدارێن سووریایا دیموقراتیك دكر و د ئەنجامێ دە زیاننە مادی و جانی دەركەتن.

هەر ل گۆری رەوانگەهێ كو دوه ژی ل باژارۆكی سوور یێ دێرازۆرێ مۆتۆرەكە ماینكری تەقیا و هەژمارەك كەس برینداركەتن.

ل باژارۆكی ئەلشحێل یێ رۆژهلاتێ دێرازۆرێ ژی بەلاڤۆكن هاتنە بەلاڤكرن كو تێنە پشتەڤانیا ریژیمێ و بانگا ڤەگەرا دەزگەهێن ریژیمێ بۆ وێ ناڤچەیێ هاتیە كرن.

ئاژانسا سانا یا رێژیما ئەسەد ژی بەلاڤكربوو كو خوەنیشاندان ل باژارێ ئەلبوسەیرە و گوندێن ئەبۆ حردەوب و زیبان و ئەلزەمان و ئەلحەوایج ل گوندەوارێ دێرازۆرێ لدژی چەكدارێن سووریایا دیموقراتیك دەركەتن و داخوازا دەركەتنا وان چەكداران ژ ناڤچەیێن خوە كرن.


ل ناڤچەنە دەرڤەیێ رۆژئاڤایێ كوردستانێ مینا رەقا و تەبقا و منبج و دێرازۆرێ پەیەدێ ب هەزاران جوانێن كورد تەڤلی شەرێن خوە ل وان ناڤچەیان كرنە و دانە شەهیدكرن، ل گۆری هن ئاماران كو دەردۆرا بیست هەزار جوانێن كورد ل وان ناڤچەیان هاتنە شەهیدكرن ، و نها ژی خەلكێن وان ناڤچەیان بانگا دەركەتنا چەكدارێن پەیەدێ و هەسەدەێ ژ وان ناڤچەیان دكن.

494