عەزیز وەیسی بۆ پەكەكە : هەتا كەنگی پەكەكە وێ ببە كلیلا داگیركەرێن كوردستانێ
آرك نيوز...فەرماندارێ پێشمەرگەیێن زەیرەڤانی رەخنەكە تووند ل پەكەكە گرت وگۆت كو هەتا كەنگی پەكەكە وێ ببە كلیلا داگیركەران .
لیوا عەزیز وەیسی فەرماندارێ فەرماندەیا پێشمەرگەیێن زەیرەڤانی ل سەر رووپەلا خوە یا تایبەت ل تۆرا جڤاكا فێسبووك نڤیسیە .. وێرایێ ئیدانەكرنا بۆمبەبارانكرنا بالەفرێن شەر یێن توركیا ل سەر دەڤەرێن سنووری یێن هەرێما كوردستانێ كو دئەنجامێ دە چار كەسێن سڤیل شەهید بوون , رەخنە ل پەكەكە گرت وگۆت پێویستە شەر وسیاسەتێ د قادا خوەدە بكن , نەك هەرێما كوردستانێ .
هەروەها عەزیز وەیسی گۆت كو خەبات وتێكۆشانا شۆرەشگەری پێویستە ژ بۆ پاراستنا خەلكێ سڤیل بە , نەك سڤیلان ژ بۆ پاراستنا خوە بكە قوربانی .
عەزیز وەیسی ئەشكەرەكر كو پەكەكە ب فەرمانا توركیا دەرباسی هەرێما كوردستانێ بوون , داكو چەكێن خوە دەینن و ژیانا ئاسایی بكن , لێ ئەگەر پەكەكە د شەرێ چەكداری دە ل گەل توركیا بەردەوام بە , پێویستە پەكەكە شەر وسیاسەتا خوە ڤەگوهازێ ناڤا خاكا توركیێ , نەك ل ناڤا خاكا هەرێما كوردستانێ خوە ژ ترسان د ناڤا ژن وزارۆكان دە ڤەشێرە ووان بكە قوربانی .
هەروەها فەرماندارێ فەرماندەیا زەیرەڤانی پرسیارەك ئارستەی پەكەكە كر وگۆت هەتا كەنگی پەكەكە وێ ببە كلیلا داگیركەران , ژ بەر داگیركەرێن كوردستانێ ب بەهانەیا هەبوونا چەكدارێن پەكەكە دەرباسی ناڤچەیێن كوردستانێ دبن , وخاك وماف وخەلكێ كوردستانێ دخنە بن مەترسی وگەفخوارنێ دە .
شەڤا چارشەما بووری ب بەهانەیا هەبوونا بنگەه وبارەگەهێن پەكەكە بالەفرێن شەر یێن توركیا چەند ناڤچەیەكە باژارۆكێ دێرەلووك یێ سەر ب ئامێدیێ ڤە ل سنوورێ پارێزگەها دهۆكێ بۆمبەبارانكرن , ودئەنجامێ دە چار وەلاتیێن سڤیل كو خەلكێ هەرێما كوردستانێ بوون شەهید كەتن .
ز.ح
964
