4 سال ل سەر رەڤاندنا رۆژنامەڤان فرهاد حمو رە دەرباس بوو

ئیرۆ، چار سال ل سەر رەڤاندنا رۆژنامەڤان و ئەندامێ سەندیكایا رۆژنامەڤانین كوردستانا سووریێ فرهاد حمو رە دەرباس بوو.

دەما كو نووچەگهانێ رووداوێ فرهاد حمو و وێنەگرێ وێ مسعود عقیل د كارەكی رۆژنامەڤانی دە بوون، رۆژا (15.12.2014) ژ ئالیێ رێخستنا تەرۆریستی (داعشێ) ڤە ل سەر ریێا ناڤدەولەتی دناڤبەرا باژارێ قامشلۆ و باژارۆكێ تل حمیس ل پارێزگەها حەسەكێ هاتبوون رەڤاندن.

پشتی نیزیكایا (11) مەهان وێنەگر مسعود عقیل هات بەردان، د ئەنجاما رێكەفتنەكە پەڤگوهەرتنا دیلان دناڤبەرا رێڤەبەریێا خوەسەر وداعشێ دە ، ل نیزیكی باژارۆكێ هۆلێ ل گوندەوارێ باشووریێ حەسەكێ ، رۆژا (21 ئەیلۆنێ سالا 2015)، دریێا ناڤبینكاریێا سەرۆك هۆزان دە، لێ رۆژنامەڤان فرهاد حمو هەتا وەكە ئیرۆ ژی چارەنڤیسا وی نە دیارە.

سەندیكایا رۆژنامەڤانێن كوردستانا سووریێ ، دەربارێ چارەنڤیسا فرهاد حمو دە، ئیرۆ(15.12.2018)، داخویانیەك بلاڤ كر وگۆت ، پشتی دەرباس بوونا چار سالی ل سەر رەڤاندنا رۆژنەمەڤان و ئەندامێ سەندیكایێ فرهاد حمو، ئەم وەكە ئەنجومان ترسا خوە ژ چارەنڤیسا وی د سالا (4) یا رەڤاندنا وی دە دیار دكن ، ئەڤ چار سالە وندا ، ئەڤ چار سالە چارەنڤیسا وی نەدیارە، بێ سەرۆشوێنە، چ زانیاری و نووچە دەربارێ چارەنڤیسا وی دە نینە، ئەم داخوازێ ژ رێخستنێن رۆژنامەڤانی یێن ناڤدەولەتی دكن كو گرنگێ بدن چارەنڤیسا فرهاد حمو.

هەروسا سەندیكایێ داخواز ژ دەستەێن ناڤدەولەتی كر كو فشارێ بكن ل سەر ئالیێن ركبەر د سووریێ دە، دا كو گارەنتیا ئازادیێا رۆژنامەڤانیێ بكن و رۆژنامەڤانان بپارێزە، وهشیاری رۆژنامەڤانان ببن د دەما رۆمالكرن وكارێن وان دە، هەروسا هیڤی ژ رۆژنامەڤانان كر كو هشیار بن و ئاگاداری رەوشا خوە بن د دەما كارێن خوە دە، ژبەر كو كارێ رۆژنامەڤانیێ پرە ل مەترسیێ و ژخوە سووریێ ژی د پلەیا رێزبەندا پێشیێ دە تێ وكارێ رۆژنامەڤانیێ ل سووریێ مەترسیدارە وگەلەك رۆژنامەڤان راستی ئەشكەنجێ وكوشتن و رەڤاندنێ ل سووریێ ژ ئالیێ رێژیمێ و گرۆپێن چەكدار ڤە هاتنە.

رێڤەبەریا خوەسەر یا كو پەیەدێ مینا ستونا سەرەكە ژێ رە یە ، د ڤێ دەما داویێ دە، هژمارەك ژ ئەندامێن رێخستنا داعشێ ئازادكرن، یا باش ئەوە بوو كو ل همبەر سەربەست بەردانا وان داخوازا ناڤێن هنەك رەڤاندیێن كورد و فرهاد حمو ژی ل داعشێ بكە مینا پرۆسەیەك پەڤگوهەرتنا دیلان.

ر.ع

614