حكوومەتا لوبنانێ 1000 پەنابەرێ سووری رادەستی رژێما ئەسەد كر
آرك نيوز .. حكوومەت وئارتێشا لوبنانێ د ئەنجامدانا بنپێكرنان دەرحەقێ پەنابەرێن سووریێ ل كەمپا عرسال بەردەوامن , وهەری داویژی ب سەدان پەنابەرێن سووریێ دەستەسەركرن .
پارێزەر انور البنی سەرۆكێ ناڤەندا سووری یا ڤەكۆلینێن یاسایی ل سەر رووپەلا خوە یا تایبەت ل تۆرا جڤاكیا فێسبووك بەلاڤكر كو شەڤا بووری ئارتێشا لوبنانی دەڤەرا عرسال دۆرپێچكر , ونێزیكی ( 750 ) پەنابەرێن سووریێ كو د ناڤ واندە ژن وزارۆك هەبوون دەستەسەركرن .
هەروەها پارێزەر انور البنی دازانین كو ئیرۆ سەرێ سبەهێ ئارتێشا لوبنانێ ئەو ( 750 ) پەنابەرێ سووریێ یێن كو دەستەسەركر بوون , ونێزیكی ( 250 ) پەنابەرێ دن كو بەریا نها ل جەم حكوومەتا لوبنانێ دەستەسەركری بوون , رادەستی چەكدارێن رژێما ئەسەد كرن
هەورەها سەرۆكێ ناڤەندا سووری یا ڤەكۆلینێن یاسایی ئەشكەرەكر كو بەریا دەمەكێ حكوومەتا لوبنانێ ب زەبرا هێز , پەنابەرێن سووریێ نەچار كربوون كو ل سەر رووپەلەكێ ئیمزە بكن , وپشتی دەرباسبوونا دەمەكێ , دەركەت كو پەنابەران ل سەر ڤەگەرا سووریێ وب تایبەتی ناڤچەیێن د بن دەستێ رژێما ئەسەد ئیمزەكربوون , بێ كو ناڤەرۆكا روپەلا ل سەر ئیمزە كربوون بزانبن .
پارێزەر انور البنی سەرۆكێ ناڤەندا سووری یا ڤەكۆلینێن یاسایی تەكەز كر كو گۆتنێن حكوومەتا لوبنانێ دوورن ژ راستیێ دەما كو دبێژە كو پەنابەران ب رازیبوونا خوە وب ئازادانە ئیمزە ل سەر ڤەگەرێ ژ بۆ سووریێ كرنە .
هەروەها سەرۆكێ ناڤەندا سووری یا ڤەكۆلینێن یاسایی گۆت كو ناڤەندا سووری یا لێكۆلین وڤەكۆلینێن یاسایی ڤێ كریارا حكوومەت وئارتێشا لوبنانێ ئیدانە وشەرمەزار دكە , ژ بەر ل گۆری یاسایێن ناڤدەولەتی ب تو ئاوایەكی نابە پەنابەر ب نەچاری ژ بۆ وەلاتێن خوە وەرنە ڤەگەراندن.
انور البنی كریارا حكوومەتا لوبنانی ب تاوانەكە دژی مرۆڤاتیێ ب ناڤ كر , ژ بەر كو مەترسی ل سەر ژیانا وان پەنابەران هەیە كو رادەستی رژێما ئەسەد هاتە كرن , وهەر مەترسیەك ل سەر ژیانا وان پەنابەران وەرە دروست كرن , حكوومەت وئارتێشا لوبنانێ بەرپرسیارن .
سەرۆكێ ناڤەندا سووری یا ڤەكۆلینێن یاسایی تەكەز كر كو د ریێا دادگەهێ ڤە , وان كەسان سزابدن یێن كو ئەو پەنابەر نەچاركرنە ل سەر ڤەگەرێ , وئەوژی ب تۆمەتا ئەنجامدانا تاوانێن جەنگێ.
د داوی دە انور البنی داخواز ژ رێخستنێن ناڤدەولەتی ونەتەوێن یەكگری وئالیێن پەیوەندیدار وخاچا سۆر كر كو ب زووترین دەم لڤ وتەڤگەرێ بكن داكو رەوشا وان پەنابەرێن كو رادەستی رژێما ئەسەد هاتنە كرن بشۆپینە .
ز.ح
435
