ل دێركێ پ ي د ب ده‌هان تۆنه‌ل دوروستكرنه
مینا عه‌فرین و گه‌له‌ك باژارێن دن یێن رۆژئاڤایێ كوردستانێ, پارتیا یه‌كیتیا دیموقراتیك پ ی د تۆره‌كه تۆنه‌لان ل ناڤا باژارێ دێركێ و ده‌ردۆرا باژێر دوروستكريه, ئه‌و یه‌ك ژی بخوه ره زیان و مه‌ترسیه‌كه مه‌زن ل جه‌م وه‌لاتیێن باژێر په‌یدادكه.
ژێده‌ره‌كه تایبه‌ت ژ ناڤا باژارێ دێركێ, ژ ئاركێ ره راگهاند كو ل سه‌ر رێیا دناڤبه‌را دێرك و عێندیوه‌رێ ده, ژ ئالیێ چه‌پێ ڤه, پ ی د تۆنه‌له‌ك كۆلایه, ده‌رگه‌هێ وێ دیار دكه لێ درێژاهی و داویا وێ دیارناكه.
هه‌روه‌ها ژ ناڤه‌ندا پارتیا ئه‌لبه‌عس یا به‌رێ ل دێركێ به‌ره‌ڤ نه‌خوه‌شخانه‌یا یه‌عقووب ل ژێر مالێن وه‌لاتیان ژی تۆنه‌له‌ك هاتیه دوروستكرن, و ژ حه‌وشا سه‌ندیكایا مامۆسته‌یان تا مالا قایمه‌قامێ دێركێ ب ئامێرێن گران تۆنه‌له‌ك هاتيه ئاڤاكرن.
ل تاخا مامۆسته‌یان و ل نیزیكی دبستانا حاج مه‌نوح نها كۆلانا خه‌نده‌كه‌كێ به‌رده‌وامه, و ژبه‌ر ته‌قینا لناڤا تۆنه‌له‌كێ, ئۆتۆمبیلا وه‌لاتیێ بناڤێ ئه‌كره‌مێ زێرا تێكچوو, هه‌روه‌ها تۆنه‌له‌ك ژ گرزه‌ركێ به‌ره‌ڤ نه‌خوه‌شخانه‌یا دێركێ ڤه هاتیه ئاڤاكرن.
سیسته‌ما ئاڤاكرنا تۆنه‌لان ل سه‌ر ژێرخانه‌یا باژێر مه‌ترسیه‌كێ په‌یدادكه, ژ ئالیه‌كێ ڤه ئه‌گه‌ر شه‌ره‌ك روودا و هه‌ر تۆنه‌له‌ك ژ وان تۆنه‌لان وه‌ر‌ه ته‌قاندن یان هه‌رفاندن وێ بخوه‌ره مال و كۆلانێن باژێر بهه‌رفینه.
ل عه‌فرینا رۆژئاڤایێ كوردستانێ ژی ته‌ڤی كو پ ی د تۆره‌كه تۆنه‌لان ئاڤاكربوو, لێ نه‌خشه‌یا وان تۆنه‌لان هه‌موو كه‌تبوو ده‌ستێ توركیێ ده و یه‌كسه‌ر توركیێ ل گه‌ل گرووپێن چه‌كدار ده‌ست دانی لسه‌ر وان تۆنه‌لان, عه‌مید حوسام عه‌واك كو ژ چه‌كدارێن سووریایا دیموقراتیك جودابووبو ژ ئاركێ ره ئه‌شكه‌ركربوو كو چل كادرۆیێن پ ك ك كو ل عه‌فرینێ دمان ل گه‌ل توركیێ كاردكرن و هه‌موو زانیاری ددان توركیێ و د ده‌ستپێكا شه‌رێ عه‌فرینێ, وان كادرۆیان خوه راده‌ستی توركیێ كرن.
583
