40 دبستانێن دێركێ ژ ئاليێ پ ي د ڤه هاتن گرتن
ل گونده‌وارێن باژارێ دێركێ یێ رۆژئاڤایێ كوردستانێ ده‌ردۆرا چل دبستانی ژ ئالیێ په‌یه‌دێ ڤه هاتنه گرتن.
ب ده‌ستپێكرنا سالا نوو یا خوه‌ندنێ, سه‌ربارێ ته‌ڤلیهه‌ڤیا پرۆسه‌یا خوه‌ندنێ كو ژ ئالیێ په‌یه‌دێ ڤه تێ كرن, په‌یه‌دێ د ئاسته‌نگكرن و ته‌ڤلیهه‌ڤكرنا پرۆسه‌یا خوه‌ندنێ ده به‌رده‌وامه.
ژێده‌ره‌كی تایبه‌ت ژ ناڤا باژارێ دێركێ یێ رۆژئاڤایێ كوردستانێ ژبۆ ئاركێ كو نه‌خوه‌ست ناڤێ وی وه‌ره ئه‌شكه‌ره‌كرن گۆت كو په‌یه‌دێ ده‌ریێ ده‌ردۆرا چل دبستانێن گونده‌وارێ باژارێ دێركێ ب بهانه‌یا نه‌بوونا خوه‌نده‌كاران گرتنه.
ل سه‌ر ڤێ مژارێ مامۆسته‌یه‌كی باژارێ دێركێ ژ ئاركێ ره گۆت ئه‌گه‌ر به‌هانه‌یا په‌یه‌دێ نه‌بوونا خوه‌نده‌كارانه, ئه‌و یه‌ك نه‌راسته, ل هه‌ر گونده‌كی هه‌ژماره‌ك مه‌زن ژ خوه‌نده‌كاران هه‌نه, لێ ئه‌و یه‌ك تێ واته‌یا ره‌دكرنا خه‌لكێ ونه‌شاندنا زارۆكێن خوه ژبۆ دبستانێن په‌یه‌دێ یێن ئایدیۆلۆچكری.
وی مامۆسته‌ی هه‌روه‌ها گۆت, ژ خوه ئه‌گه‌ر خوه‌نده‌كار هه‌نه, و په‌یه‌دێ ده‌رگه‌هێن دبستانان گرتنه, ئه‌و یه‌ك تێ واته‌یا كو په‌یه‌دێ دخوازه یه‌كجاری زارۆكێن كوردان دووری خوه‌ندنێ بخه, د هه‌ردوو به‌هانه‌یان ده ژی, زیاندارێ سه‌ره‌كه خوه‌نده‌كارێ كورده واته جڤاك و پێشه‌رۆژا نفشه‌كی ژ كوردان ل رۆژئاڤایێ كوردستانێ یه.
ژبه‌ر رێبازێن په‌یه‌دێ یێن ئایدیۆلۆچكری ب هه‌زاران مالباتێن رۆژئاڤایێ كوردستانێ به‌رێ خوه دانه شام و پارێزگه‌هێن دن یێن سووریێ ژبۆ به‌رده‌وامكرنا خوه‌ندنا زارۆكێن خوه, هه‌ژماره‌ك مه‌زن ژ وان مالباتان زارۆكێن خوه دشینن دبستانێن لژێر كۆنترۆلا رێژیما سوریێ, ژبۆ مسۆگه‌ركرنا دانپێدانا باوه‌رنامه‌یێن خوه‌ندنێ ژبۆ زارۆكێن خوه, سه‌رباری هه‌ژماره‌كه دن كو ژ رۆژئاڤایێ كوردستانێ كۆچبه‌ر بوویه ژبۆ پێشه‌رۆژ و خوه‌ندنا زارۆكێن خوه.
529
