ل گونده‌وارێن دێركێ دبستان ل 35 گوندان ژ ئالیێ په‌یه‌دێ ڤه‌ هاتن گرتن

د به‌رده‌وامیا سیاسه‌تا په‌یه‌ده‌ ژ بۆ ژناڤبرنا سیسته‌مێ خوه‌ندنێ ل رۆژئاڤایێ كوردستانێ , هه‌ری داوی ل ( 35 ) گوندێن باژارێ دێركێ دبستان ب بێ به‌هانه‌ هاتنه‌ داخستن , وزارۆك ژ خوه‌ندنێ بێ پار مانه‌.

ده‌ربارێ گوهارتنا سیسته‌مێ خوه‌ندنێ پسپۆرێن په‌روه‌رده‌یی دبێژن كو سیسته‌ما خوه‌ندنێ ل سووریێ ب گشتی و رۆژئاڤایێ كوردستانێ ب تایبه‌ت د قوناغه‌كه‌ گه‌له‌ك مه‌ترسیدار ده‌ ده‌رباس دبه‌, ژ به‌ر كو په‌یه‌ده‌ ژ بۆ به‌رژه‌وه‌ندیێن خوه‌ یێن حزبی ده‌ست ب ژناڤبرنا سیسته‌ما خوه‌ندنێ كرنه‌ .

پسپۆرێن په‌روه‌رده‌یی ته‌كه‌زیی ل سه‌ر وێ چه‌ندێ دكن كو رێژیما ئه‌سه‌د د ریێا دار وده‌ستێن خوه‌ كاری سیسته‌ما په‌روه‌رده‌یێ و خوه‌ندنێ د جڤاكا كوردی ده‌ وێرانك بكه‌ , و په‌یه‌ده‌ كو دار وده‌ستێ رژێما ئه‌سه‌د د ریێا سه‌رپه‌رشتیا دام وده‌زگه‌هێن په‌روه‌رده‌یێ وب ئاوایه‌كی رێبازكری به‌رده‌وام هه‌ولا شووشتنا مه‌ژیێ جوانێن رۆژئاڤایێ كوردستانێ دده‌ , داكو نفشێن نوو یێ رۆژئاڤایێ كوردستانێ ژ بۆ به‌رژه‌وه‌ندیێن خوه‌ یێن تایبه‌ت ب كار بینه‌ , وب ڤی ره‌نگی نها نفشه‌كی دوور ژ خوه‌ندن وزانستێ ل رۆژئاڤایێ كوردستانێ په‌یدابووه‌.

ژێده‌ره‌كی تایبه‌ت ژ رۆژئاڤایێ كوردستانێ بۆ ئاركێ راگه‌هاند كو د هه‌ر پۆله‌كێ ده‌ بهتری سه‌د شاگرت هه‌یه‌ و هین ژی تۆماركرن به‌رده‌وامه‌ , ومامۆستایێن دبستانان ڤێ یه‌كێ ب كاره‌ساته‌كه‌ مرۆڤی ب ناڤ دكن .

ژناڤبرنا سیسته‌مێ خوه‌ندنێ ل رۆژئاڤایێ كوردستانێ ل سه‌ر ده‌ستێ په‌یه‌دێ بوو سه‌ده‌ما ده‌ربده‌ریا هژماره‌ك مه‌زن ژ خه‌لكێ ژ بۆ ده‌ڤه‌رێن دبن كۆنترۆلا رێژیما ئه‌سه‌د ده‌ , هه‌روه‌ها بوو سه‌ده‌ما په‌نابه‌ریا ب هه‌زاران ژ كوردێن رۆژئاڤایێ كوردستانێ به‌رڤ وه‌لاتێن هه‌رێمی ویه‌كیتیا ئۆرۆپا , ئه‌وژی ژ به‌ر كو سیسته‌مێ خوه‌ندنێ ل رۆژئاڤایێ كوردستانێ هاته‌ ژناڤبرن .

378