رۆژنامهيهك: رۆسيا بهرێ مووشهكێن خوه دده ئدلبێ
تهڤی لههڤكرنا رۆسی توركی دهربارێ ئدلبا سووریێ و بریارا ئاڤاكرنا ناڤچهیهكه بێ چهك, رۆژنامهیهكه رۆسی دبێژه رۆسیا بهرێ مووشهكێن خوه دایه ئدلبێ.
رۆژنامهیا نیزافیسیمایا گازیتا یا رۆسی بهلاڤكریه كو رێخستنا بناڤێ تهحریر ئهلشام ل ئدلبێ وێ مهرجێن رێكهفتنا ئاڤاكرنا ناڤچهیهكه بێ چهك ل ئدلبێ بجی نهكه.
ل گۆری وێ رۆژنامهیێ كو ژبهر سهدهما نهبجیكرنا تهحریر ئهلشام ژ رێكهفتنا ئدلبێ ره, دڤێ هێز ژبۆ نهچاركرنا وان ژبۆ دانینا چهكان و دهركهتن ژ ناڤچهیا بێ چهك, وهره بكارئانین.
رۆژنامهیا رۆسی گۆت كو وهزیرێ بهرهڤانیێ یێ توركیێ راگهاندیه كو وهلاتی وی وێ ئۆپهراسیۆنێن لهشكهری ل ئدلبێ ب ههماههنگی ل گهل رۆسی بهردهوام بكه.
رۆژنامهیا ناڤبۆری گۆت كو رۆسیا ژی خوه ژبۆ ئۆپهراسیۆنا لهشكهری ل باكورێ سووريێ ئاماده دكه, و دوور نابینه كو گهمیێن رۆسی یێن شهر كو راهێنانێن خوه ل رۆژهلاتێ دهریایا سپی پێك تینن, ب مووشهكان كۆمێن چهكدار یێن نهرهوایی ل ئدلبێ ئارمانج بكن.
ل سهر رێكهفتنا ئدلبێ ئهمیندارێ گشتی یێ نهتهوێن یهكگرتی جارهكه دن دلخوهشیا خوه نیشان دا و بانگ ل ههموو ئالیان كر كو رێكهفتنێ بجی بكن و سڤیلان بپارێزن.
ئهنتۆنیۆ گۆتیرێس ئهمیندارێ گشتی یێ نهتهوێن یهكگرتی د كۆنگرهكی رۆژنامهڤانی ده لبارهگهها نهتهوێن یهكگرتی ل نیۆیۆركێ گۆت ئهگهر بشێوهیهكی راستهقینه رێكهفتنا سۆتشی وهره بجیكرن, دبه كو سێ مهلیۆن سڤیل دناڤ وان ده مهلیۆنهك زارۆك, ژ كارهساتهكێ وهرن رزگاركرن.
گۆتیرێس ههروهها بانگا كارێ بلهز ژبۆ بجیكرنا بێشكهتنهكه بهتر د پرۆسهیا جنێڤێ ده كر نهخاسم پشتهڤانیا ستیڤان دیمهستۆرا د ئاڤاكرنا كۆمیتهیا دهستووری ده.
454
