ڤەگەرا لەشکەرێ رۆژ بۆ رۆژئاڤایێ کوردستانێ نەرین وشرۆڤە
پشتی كو پرسا ڤه‌گه‌را له‌شكه‌رێ رۆژ ژ بۆ رۆژئاڤایێ كوردستانێ ژئالیێ ئه‌مریكا ڤه بوو جهێ گرینگی وپێویستیێ , ل سه‌ر ئاستی له‌شكه‌ری جنێرال باتریك رۆبه‌رسۆن فه‌رماندارێ گشتی یێ تیما هه‌ڤبه‌شا ئوپه‌راسیۆنێن تایبه‌ت ل عێراق و سووریێ وسیاسی ل گه‌ل مه‌سروور بارزانی شێورمه‌ندێ ئاساییشا هه‌رێما كوردستانێ مژارا یه‌كبوونا هێزێن كوردی ل رۆژئاڤایێ كوردستانێ گۆووتبێژكر , ول سه‌ر ئاستی سیاسی شانده‌كه فه‌ره‌نسی , وئه‌مریكی ب جودا سه‌ردانا ئۆفیسا نوونه‌رێن ئه‌نجوومه‌نا نشتیمانی یا كورد ل سووریێ د هه‌ڤپه‌یمانیا نشتیمانی یا ئۆپۆزسیۆنا سووریێ كرن , وپرسا ڤه‌گه‌را له‌شكه‌رێ رۆژ هاته گۆتووبێژكرن .
ده‌ربارێ پرسا ڤه‌گه‌را له‌شكه‌رێ رۆژ بۆ رۆژئاڤایێ كوردستانێ عبد الباست حمۆ جێگرێ سه‌رۆكێ هه‌ڤپه‌یمانیا نشتیمانی یا ئۆپۆزسیۆنا سووریێ ژ ئاركێ ئه‌شكه‌ره‌كر كو گوهارتنێن به‌رچاڤ د سیاسه‌ت وستراتیژیه‌تا ئه‌مریكا ده ل ناڤچه‌یێ هه‌نه , و ژ بۆ سه‌ركه‌تنا سیاسه‌تا نوو یا ئه‌مریكا ل رۆژهلاتێ چه‌مێ فه‌راتێ , پێویستا ئه‌مریكا ب ڤه‌گه‌را له‌شكه‌رێ رۆژ بۆ رۆژئاڤایێ كوردستانێ هه‌یه, وئه‌مریكا ب جددی ل سه‌ر پرسا كورد وێ راوه‌سته .
وژئالیێ خوه‌ڤه سه‌عید عمر به‌رپرسێ ئۆفیسا په‌یوه‌ندیێن ده‌رڤه یا پارتیا دیموكراتا كوردستان سوریا د گوتاره‌كێ ده راگه‌هاند كو پێویسته رۆلا له‌شكه‌رێ رۆژ ل رۆژئاڤایێ كوردستانێ ئه‌كتیڤ ببه , ژ به‌ر به‌رده‌وام له‌شكه‌رێ رۆژ به‌ره‌ڤانی دبه‌ر پاراستنا خاك ورومه‌تا كوردان كرنه .
هه‌روه‌ها عمر كۆجری ئه‌ندامێ كۆمیتا ناڤه‌ندی یا پارتیا دیموكراتا كوردستان سوریا راگه‌هاند كو ژ بۆ پاراستنا به‌رژه‌وه‌ندیێن خوه , د ده‌ما نهاده ئه‌مریكا دخوازه له‌شكه‌رێ رۆژ ل رۆژئاڤایێ كوردستانێ بكه هه‌ڤبه‌شێ راسته‌قینه , وژ به‌ر ڤێ چه‌ندێ ئه‌مریكا وێ فشارێ ل په‌یه‌ده بكه داكو رووبرووبوون دروست نه‌بن.
وژئالیێ خوه‌ڤه چالاكڤانێ سیاسی سیپان سه‌یدا د لێدوانه‌كه تایبه‌ت ده ژ بۆ ئاركێ گۆت كو ڤه‌گه‌را له‌شكه‌رێ رۆژ د ڤێ قۆناغێ ده ژ بۆ رۆژئاڤایێ كوردستانێ گه‌له‌ك گرینه‌گه ,ئه‌وژی ژ به‌ر كو هه‌بوونا هێزه‌كه كوردی ل سه‌ر عه‌ردێ گه‌ره‌نتیێ دده ب ده‌ستخستنا مافێن گه‌لێ كورد ل رۆژئاڤایێ كوردستانێ , وژبۆ ڤه‌گه‌را له‌شكه‌رێ رۆژ پێویسته ئالیێن كوردی ل هه‌ڤكرنه‌كێ پێكبینن .
587
