سه‌ركرده‌يه‌كي ي پ ك: ئه‌مه‌ريكا فتنه‌يێ ناڤبه‌را مه و رژيمێ ده دوروست دكه
سه‌ركرده‌یه‌كی چه‌كدارێن یه‌په‌گێ یێن بسه‌ر په‌یه‌دێ ڤه ئه‌مه‌ریكا ب شه‌روپه‌ڤچوونێن رۆژا هه‌شتێ ڤێ مه‌هێ ناڤبه‌را رژیم و په‌یه‌دێ ده ل باژارێ قامشلۆ رووداین تۆمه‌تبار دكه و دبێژه ئه‌مه‌ریكا فتنه‌یێ ناڤبه‌را وان و رژیمێ ده دوروست دكه.
د داخویانیه‌كێ ده ژبۆ رۆژنامه‌یا ئه‌لوه‌ته‌ن یا نیزیكی رژیما سووریێ رێزان حدۆ راوێژكارێ راگهاندێ یێ به‌رێ یێ چه‌كدارێن یه‌په‌گێ ل عه‌فرینێ یێن بسه‌ر په‌یه‌دێ ڤه گۆت ئه‌مه‌ریكا ل پشت شه‌رو په‌ڤچوونێن كو ل قامشلۆ روودانه یه, كو هه‌ژماره‌ك چه‌كدارێن رژیم و په‌یه‌دێ د وێ بویه‌رێ ده هاتنه كوشتن.
حدۆ هه‌روه‌ها ژبۆ ئه‌لوه‌ته‌ن گۆت كو ئالیه‌ك دناڤا رێڤه‌به‌ریا خوه‌سه‌ر یا په‌یه‌دێ ده هه‌یه ب نیاز شاشتیێن مه‌زن پێك تینه, و تشتا ل قامشلۆ روودای تاوانه‌كه لدژی سووریێ.
رۆژا هه‌شتێ ڤێ مه‌هێ شه‌ر و په‌ڤچوون ناڤبه‌را چه‌كدارنه په‌یه‌دێ و یێن رژیمێ ل ناڤا باژارێ قامشلۆ یێ رۆژئاڤایێ قامشلۆ ده‌ركه‌تن و د ئه‌نجامێ ده حه‌فت چه‌كدارێن په‌یه‌دێ ژیانا خوه ژ ده‌ست دان و چارده چه‌كدارێن رژیمێ ژی هاتن كوشتن سه‌رباری هه‌ژماره‌ك بریندار ژ هه‌ردوو ئالیان و به‌لاڤبوونا ره‌وشه‌كه نه‌ئارامیێ لناڤا باژێر.
پشهاته‌یێن ڤێ داویێ ناڤبه‌را په‌یه‌دێ و رژێمێ هه‌ڤده‌می وێ یه‌كێ تێن كو په‌یه‌دێ به‌حسا گه‌رێن جڤینان لشامێ برژیما سووریێ ره لژێر ناڤێ دیالۆگ و دانوستاندنان دكه, كو تا نها ژی رژیمێ تو ئعتراف ب وان جڤینان نه‌كریه, ته‌نێ وه‌لید ئه‌لموعه‌لم وه‌زیرێ ده‌رڤه یێ رژیمێ به‌ریا چه‌ند رۆژان د كۆنگره‌كی رۆژنامه‌ڤانی ده گۆتبوو ئه‌و كه‌سێن هاتنه شامێ واته سه‌ركرده‌یێن په‌یه‌دێ ته‌كه‌ز كرنه كو ئه‌و فدرالیێ ناخوازه.
سه‌ركرده‌یێن په‌یه‌دێ بخوه ژی پشتی كو ئه‌ڤ دوو سالبوون به‌حسا فدرالیێ دكرن, ئێدی ته‌نێ به‌حسا نه‌ناڤه‌ندیێ ژبۆ سووریایا پێشه‌رۆژێ دكن بێ كو شێوه و ئاوایێ وێ نه‌ناڤه‌ندیێ ده‌ستنیشان و شرۆڤه بكن.
764
