رێخستنا ئاسۆری بنپێكرنێن پ ی د ده‌رحه‌قێ دبستانێن خرستیانی شه‌رمه‌زار دكه
رێخستنا ئاسۆری یا دیموقراتی بنپێكرنێن په‌یه‌دێ ده‌رحه‌قێ دبستانێن خرستیانی ل جزیرا رۆژئاڤایێ كوردستانێ بتوندی شه‌رمه‌زار كر و بانگ ل په‌یه‌دێ و ئالیێن بسه‌ر ڤه كر كو ده‌ڤ ژ سیاسه‌تا خوه یا شاش به‌ردن
د داخویانیه‌كێ ده پۆلیتبیرۆیا رێخستنا ئاسۆری یا دیموقراتی گۆت رۆژا بیست و هه‌شتێ ته‌باغا دوهه‌زار و هژده‌هان چه‌كدارنه رێڤه‌به‌ریا په‌یه‌دێ دناڤ ده چه‌كدارنه سۆتۆرۆ یێن پارتیا یه‌كیتی یا سریانی كو بسه‌ر رێڤه‌به‌ریا په‌یه‌دێ ڤه نه ئێریشی دبستانێن سریانی یێن تایبه‌ت ل تاخێن ئه‌لوستا و غه‌ربیه و ئه‌ربه‌ویه یێن باژارێ قامشلۆ كرن و كادر و كارمه‌ندێن وان دبستانان ده‌ركرن و ئه‌و دبستان ده‌سته‌سه‌ركرن و ئه‌و یه‌ك ژی بوو جهێ نه‌رازیبوونا سریانێن ئاشۆر و خوه‌نیشاندانه‌ك ل پێش دبستانا ئه‌لئه‌مه‌ل یا تایبه‌ت لدارخست و چه‌كدران گوله ل سه‌ر وان به‌ردان
پۆلیتبیرۆیا رێخستنا ئاسۆری ئه‌و بنپێكرن شه‌رمه‌زار كرن و ب هۆڤانه بناڤكر و بانگ ل رێڤه‌به‌ریا په‌یه‌دێ كر كو ده‌ڤ ژ رێبازا خوه یا كو خزمه‌تا تو ئالیان ناكه, به‌رده, و گۆت ئه‌و سیاسه‌تێن وێ بوونه سه‌دمه‌م كو گه‌له‌ك مالبات به‌ره‌ڤ پارێزگه‌هێن دن ڤه بچن یان كۆچبه‌ر ببن ژبۆ خوه‌ندنا زارۆكێن خوه.
پۆلیتبیرۆیا رێخستنا ئاسۆری هه‌روه‌ها بانگ ل پارتیا یه‌كیتی یا سریانی كر كو ل بویه‌را كو روودای دووری ناكۆكیێن پارتیانه, ڤه‌گه‌رن, و خوه دووری خوه‌فه‌رزكرنێ بكن.
رێخستنا ئاسۆری د داخویانیا خوه ده دبێژه پرسا دبستان و رێبازێن خوه‌ندنێ مژاره‌كه یاسایی یه, رێبازێن ده‌وله‌تێ فه‌رمی و دانپێدانكری نه, به‌رۆڤاژیێ رێبازێن په‌یه‌دێ كو تو ره‌واتیا یاسایی و ئعتراف ل سه‌ر ئاستا ناڤخوه و هه‌رێمی و ناڤده‌وه‌لتی ڤه نینن.
رۆژا بیست و هه‌شتێ ته‌باغا دوهه‌زار و هژده‌هان هێزه‌كه ئه‌سایشا په‌یه‌دێ ب یاوه‌ریا چه‌كدارنه سۆتۆرۆ یێن خرستیانی ل گه‌ل هه‌ژماره‌ك سه‌ركرده‌یێن خرستیانی یێن نیزكی په‌یه‌دێ دبستانا ئه‌لحوریه دۆرپێچكر و داخواز ژ رێڤه‌برێ دبستانێ كر كو كلیتێن دبستانێ راده‌ستی وان بكن, لێ رێڤه‌برێ وێ دبستانێ رازینه‌بوو.
پشتی یه‌ك ده‌مژمێرێ وێ هێزا هه‌ڤبه‌ش یا سۆتۆرۆ و ئه‌سایشا په‌یه‌دێ كلیتێن دبستانێ گوهه‌رتن, و هه‌موو كادر و كارمه‌ندێن ل وێ دبستانێ ده‌ركرن, ده‌ردۆرا ده‌مژمێر یه‌ك و نیڤێ پشتی نیڤرۆ ل سه‌ر ده‌رگه‌هێ دبستانێ ب سریانی نڤیساندن" دبستانا ئه‌لحوریه یا سه‌ره‌تایی و ئاماده‌ی".
ئه‌و كریارا هه‌ڤبه‌ش یا چه‌كدارێن سۆتۆرۆ و ئه‌سایشا په‌یه‌دێ بوو جهێ نه‌رازیبوونا خرستیانیێن ده‌ڤه‌رێ , و ل تاخا ئه‌لوستا یا باژارێ قامشلۆ خوه‌نیشاندانه‌ك لدژی وێ یه‌كێ هات لدارخستن, تێ ده ئالا رژیمێ و بانگا ڤه‌گه‌را ده‌ستهلاتا رژیمێ بۆ سه‌رانسه‌ری باژارێ قامشلۆ هه‌روه‌ها سلۆگانا یه‌كه یه‌كه گه‌لێ سووریێ یه‌كه هاتن بلندكرن, لێ چه‌كدارێن سۆتۆر گوله لسه‌ر وێ خوه‌نیشاندانێ ره به‌ردان
خوه‌نیشانده‌ران خوه‌نیشاندانا خوه به‌رده‌وام كرن و كلیتێن دبستانێن ئه‌لئه‌مه‌ل, مار ئه‌فرام, مار كه‌برئیل شكاندن و ل هندرێ كه‌نیسه‌یا ئه‌لعه‌زا مانگرتنه‌ك لدارخست.
خرستیانێن رۆژئاڤایێ كوردستانێ دناڤا خوه ده بوونه سێ به‌ش, به‌شه‌ك ب رێڤه‌به‌ریا په‌یه‌دێ ره, ئالیێ وێ یێ هه‌ری ناڤدار یێ سیاسی پارتیا یه‌كیتیا سریانی یه, و ژبۆ خوه هێزێن سۆتۆرۆ ژی ئاڤاكرنه.
به‌شێ دن ب رژیما سووریێ ره‌یه, و لباژارێ قامشلۆ ئالا رژیمێ بلنددكن و هێزێن سۆتۆرۆ ب پشته‌ڤانیا رژیمێ ئاڤاكرنه.
ژبلی وان هه‌ردوو به‌شان, به‌شه‌كه دن ژی دژبه‌ری رژیمێ و سیاسه‌تێن په‌یه‌دێ ژی هه‌یه.
262
