ب سەدەما پەكەكە ژمارەیەك ناڤچەیێن هەرێما كوردستانێ هاتنە بۆمبەبارانكرن

ارك نيوز .. قایمەقامێ شنگالێ دبیژە كو شەڤا بووری بالەفرێن چەنگی یێن توركیا ب سەدەما هەبوونا بارەگەهێن پەكەكە چیایێ شنگالێ ب دەها مووشەك بۆمبەبارانكرن .

مەحما خەلیل قایمەقامێ شنگالێ راگەهاند كو شەڤا بووری وهەتا سەرێ سبەهیا ئیرۆ دوشەمێ بنگەه وبارەگەهێن پەكەكە ل چیایێ شنگالێ , ودەڤەرێن " چل مێرا , كەرەسی وباری " وچەند ناڤچەیەكە دن یێن سەر ب شنگالێ ڤە ژ ئالیێ بالەفرێن جەنگی یێن توركیا ڤە هاتنە بۆمبەبارانكرن.

وەكە مەحما خەلیل ئەشكەرەكر كو بالەفرێن شەر یێن توركیا ب بهتر ژ چل مووشەكی ئەو ناڤچە بۆمبەبارانكرن , وهەتا وەكە نها تو زانیاریەك ل سەر زیانان نەهاتیە زانین.

قایمەقامێ شنگالێ گۆت ب سەدەما بۆمبەبارانكرنا دەڤەرێ مەترسی د ناڤا خەلكێ دە بەلاڤبوویە , وبوویە سەدەم كو خەلكێ شنگالێ نكاربن ب ئەولەهی د مالێن خوەدە ژیان بكن .

ژێدەرێن راگەهاندنێ یێن هەرێما كوردستانێ ئەشكەرەكرن كو هەڤدەم ل گەل بۆمبەبارانكرنا شنگالێ , بالەفرێن شەر یێن توركیا هەردو قەزایێن ئاكرێ وئامێدیێ یێن سەر ب پارێزگەها دهۆكێ ڤە بۆمبەبارانكرن.

وەكە هاتیە پشت راستكرن كو سەدەما بۆمبەبارانكرنا هەردو قەزایێن ئاكرێ وئامێدیێ ژ ئالیێ بالەفرێن شەر یێن توركیا ڤە , هەبوونا بارەگەهێن چەكدارێن پەكەكە یە ل وان ناڤچەیان , وهاتە تەكەزكرن ژی كو تو زانیاریەك ل سەر زیانیان نەهاتیە زانین.

بالەفرێن شەر یێن توركیا د ئۆپەراسیۆنا بۆمبەبارانكرنا ناڤچەیێن هەرێما كوردستانێ ب سەدەما هەبوونا بنگەهێن پەكەك بەردوام بوون , وهەر شەڤا بووری بالەفرێن شەر یێن توریكا بنگەه وبارەگەهێن پەكەكە ل چیایێ قەرەچۆخ ل سنوورێ قەزا مەخموور بۆمبەبارانكرن

439