ئەلمانیا وێ پشتەڤانیا پلانا توركیا ب ئاڤاكرنا پەناگەهان بۆ دەربدەرێن ئدلبێ بكە
آرك نيوز...راوێژكارا ئەلمانیا پشتەڤاینا وەلاتێ خوە بۆ ئاڤاكرنا پەناگەهان ژ بۆ دەربدەرێن باژارێ ئدلبێ نیشان دا , ئەوژی وەكە پشتەڤانیەكێ ژ بۆ پلانا توركیا .
ئەنجێلا مێركل د كۆنگرەیەكی رۆژنەمەڤانیێ هەڤبەش دە ل گەل رەجەب تەیب ئەردۆغان سەرۆكێ توركیا پشتەڤانیا وەلاتێ خوە ژ بۆ پلانا توركیا یا تایبەت ب ئاڤاكرنا پەناگەهان ژ بۆ دەربدەرێن ئدلبێ یێن دئەنجاما ئێریشێن رژێما ئەسەد ورۆسیا دە مالێن خوە ب جی هشتنە نیشان دا .
وەكە تۆرا " دی دەبلیۆ " یا نووچەیان راگەهاندیە راوێژكارا ئەلمانی ئامادەییا وەلاتێ خوە ژ بۆ دابینكرنا پشتەڤانیا مادی ژ بۆ ئاڤاكرنا پەناگەهان نیشان دا ووەكە كارەكی مرۆڤی ب ناڤكر.
وژئالیێ خوەڤە رەجەب تەیب ئەردوغان سەرۆكێ توركیا د كۆنگرەیێ رۆژنەمەڤانی دە گۆت كو ( 400 ) هەزار كەس ژ ئدلبێ دەربدەر بوونە , ونها بەرێ خوە دانە سینوورێن توركیا , وئەو پەنابەرێن ئدلبێ دخوازن روو ل وەلاتێن یەكیتیا ئۆرۆپا بكن .
هەرد دوه د ژێدەرێن خوەجهی ژ باژارێ منبجێ راگەهاندن كو ب دەهان ژ مالباتێن دەربدەرێن باژارێ ئدلبێ كو دئەنجاما ئێریشێن رژێما ئەسەد ورۆسیا دە مالێن خوە ب جی هشتنە گەهشتنە باژارێ منبجێ كو دبن كۆنترۆلا هێزێن سووریایا دیموكراتیك دەیە .
بەریا نها مەزلوون عەبدێ بەرپرسیارێ گشتی یێ هێزێن سووریا یا دیموكراتیك ئامادەییا هەسەدە نیشاندا بوو كو پێشوازیێ ل دەربدەرێن باژارێ ئدلبێ بكە .
تەڤی رێكەفتنا رۆسیا وتوركیا ل سەر ئاگربەستی ل ئدلبێ , لێ هینا ئێریشێن رژێما ئەسەد ل سەر باژارێ ئدلبێ بەردەوامن , وەكە ژێدەرێن راگەهاندنێ بەلاڤكرنە توركیا ژ گرووپێن چەكدار یێن ئدلبێ رە راگەهاندن كو پێویستە ئەو بخوە رووبرووێ ئێریشێن رژێما ئەسەد ببن وبەرەڤانیێ ل خوە بكن .
200
