نێچیرڤان بارزانی وغۆتیریس رەوشا پەنابەرێن رۆژئاڤایێ كورستانێ گۆتووبێژكرن

آرك نيوز...سەرۆكێ هەرێما كوردستانێ ل گەل سكرتێرێ گشتی یێ نەتەوێن یەكگرتی داوین پێشهاتەیێن دەڤەرێ , ورەوشا پەنابەرێن رۆژئاڤایێ كوردستانێ یێن ل هەرێما كوردستانێ دمینن گۆتووبێژكر .

د چارچۆڤەیا بەشداریێ د كۆربەندێ ئابووری یێ جیهانێ ل دڤۆسا سوویسرا نێچیرڤان بارزانی سەرۆكێ هەرێما كوردستانێ و ئەنتۆنیۆ گۆتیرێس ئەمیندارێ گشتی یێ نەتەوێن یەكگرتی جڤیان , و د جڤینێ دە داوین پێشهاتەیێن ناڤچەیێ وخوەنیشاندانێن عێراقێ هاتنە گۆتووبێژكرن.

هەروەها د جڤینێ دە هەردو ئالیان تەكەزی ل سەر هێمنكرنا ئالۆزیان , ورۆلا نەتەوێن یەكگرتی د هێمنكرنا رەوشێ دە هاتە كرن , وتەكەزی ل سەر بەردەوامیا هەماهەنگیێ ناڤبەرا نەتەوێن یەكگرتی ودەزگەهێن هەرێما كوردستانێ دە هاتە كرن .

وەكە هاتە راگەهاند د جڤینێ دە رەوشا دەربدەرێن عێراقێ , وپەنابەرێن رۆژئاڤایێ كوردستانێ یێن ل هەرێما كوردستانێ دمینن هاتە گۆتووبێژكرن , وتەكەزی ل سەر بەردەوامیا پێشكێشكرنا ئالیكاریان بۆ دەربدەرێن عێراقی , وپەنابەرێن رۆژئاڤایێ كوردستانێ هاتە كرن.

ژ دەما تێكچوونا رەوشا سووریێ ب گشتی ویا رۆژئاڤایێ كوردستانێ ب تایبەتی ب سەدان هەزار كوردێن رۆژئاڤایێ كوردستانێ ژ بۆ دابینكرنا دەبارا ژیانێ روو ل هەرێما كوردستانێ كرن , ول ژمارەیەك كامپ ل هەرسێ پارێزگەهێن هەرێما كوردستانێ هاتنە بجیكرن .

ل گۆری داوین ئامار د دەما نهادە بهتر ژ ( 200 ) هەزار پەنابەرێن رۆژئاڤایێ كوردستانێ ل هەرێما كوردستانێ هەنە , ود دەما داوی دە ژی ودئەنجاما ئێریشا توركیا بۆ سەر رۆژئاڤایێ كوردستانێ بهتر ژ ( 20 ) هەزار پەنابەرێن رۆژئاڤایێ كوردستانێ روو ل هەرێما كوردستانێ كرن , وهینا پرۆسەیا پەنابەریێ بۆ هەرێما كوردستانێ بەردەوامە .

499