گراهام وڤان هۆلێن : دەمێ سەپاندنا سزایان ب سەر توركیا دە هاتیە

آرك نيوز...دو سیناتۆرێن ئەمریكی داخواز ژ ئیدارەیا دۆنالد ترامپ سەرۆكێ ئەمریكا كرن كو سزایان ب سەر توركیا دە ب سەپینن , ئەوژی ب سەدەما كرینا سیستەمێ ئێس چارسەد یێ رۆسی ژ ئالیێ توركیا ڤە .

لیندسی گراهام , وكرێس ڤان هۆلین ئەندامێن ئەنجوومەنێ پیرێن ئەمریكا نامەیەك بۆ مایك پۆمپیۆ وەزیرێ دەرڤەیێ ئەمریكا شاندن , وتێدە داخوازا سەپاندنا سزایان ب سەر توركیا دە كرن , وگۆتن ئیدی نابە دەرفەت ب توركیا وەرە دان , وبوویە دەمێ بجیكرنا سزایان .

هەروەها هەردو سیناتۆران تەكەز كرن وگۆتن كو ئەگەر ئەمریكا سزایان ب سەر توركیا دە نەسەپینە , وی دەمی گەلەك وەلات وێ گالتەیێ ب یاسایێن ئەمریكا بكن , ووێ بێژن كو ئەمریكا نەپابەندە ب یاسایێن خوەڤە وتو واتەیەك ژ سزایێن ئەمریكارە نینن .

بەریا نهاژی پێنج سیناتۆرێن ئەمریكی نامەیەك ژ بۆ مایك پۆمپیۆ وەزیرێ دەرڤەیێ ئەمریكا شاندن , وتێدە ئاماژە ب راپۆرتێن كو بەحسا بكارئانینا چەكێن كیمیاوی ژ ئالیێ توركیا ڤە ل دژی كوردان ل رۆژئاڤایێ كوردستانێ دان وگۆتن كو پێویستە ل سەر ڤێ مژارێ وەرە
راوەستاندن .

هەروەها سیناتۆرێن ئەمریكی د نامەیا خوەدە گۆتن كو بریار بوو ئەمریكا سزایێن تووند ب سەر توركیا ب سەپینە ئەگەر توركیا ئاگربەست ورێكەفتنێ بنپێ بكە , و د دەما نهادە توركیا وگرووپێن ب سەرڤە بنپێكرنان ب بەلگە ئەنجام ددە , وئەمریكا تو سزایەكە نەسەپاند .

وژئالیێ خوەڤە كرێستۆفەر ڤان هۆلین سیناتۆرێ دیموكراتیان ل رووپەلا خوە ل تۆرا جڤاكیا تویتەر راگەهاندبوو كو رەجەب تەیب ئەردوغان سەرۆكێ توركیا پشتی دو حەفتیان ژ سەردانێ بۆ كۆشكا سپی یا ئەمریكی , نها ئەردوغان پشتا خوە ل دۆنالد ترامپ وئەمریكا كریە .

كریستۆڤەر ڤان هۆلین گۆتبوو دەما كو توركیا سیستەمێ بەرەڤانیا ئێس چارسەد یێ رۆسی تاقی دكە , تێ وێ واتەیێ كو توركیا پشتا خوە ل هەڤپەیمانیا باكوورێ ئەتلەسێ ئانگۆ ناتۆ وئەمریكا كریە , وب ڤی ئاوایی رەجەب تەیب ئەردۆغان سەرۆكێ توركیا هێلا سۆر دەرباسكریە.

هەروەها سیناتۆرێ ئەمریكی ئاماژە ب وێ چەندێ كربوو كو ئەو كار ل سەر پرۆژەیاسایا سەپاندنا سزایان ب سەر توركیا دە دكن , ئەوژی ب سەدەما رژدبوونا توركیا ل سەر كرینا سیستەمێ ئێس چارسەد یێ رۆسی , ونها د كۆنگرێسێ ئەمریكا دە كار ل سەر سەپاندنا سزایان تێ كرن .

بەردەوام كۆنگرێسێ ئەمریكی پرۆژەیان گۆتووبێژ دكە داكو سزایان ب سەر توركیا دە ب سەپینن , وهینا پرۆژەیا سەپاندنا سزایان سەد ل سەر سەد نەهاتیە بجیكرن .

310