توركیا گەفا دوبارە دەستپێكرنا ئێریشێ بۆ سەر رۆژئاڤایێ كوردستانێ دكە

آرك نيوز...توركیا گەفا دوبارە دەستپێكرنا ئێریشێ بۆ سەر رۆژهلاتێ چەمێ فەراتێ وكوردستانا سووریێ دكە , ودبێژە رۆسیا وئەمریكا خالێن رێكەفتنان جیبجی نەكرنە .

مەولوود چاویش ئۆغلۆ وەزیرێ دەرڤەیێ توركیا د لێدوانەكە رۆژنەمەڤانی دە راگەهاند كو ئەمریكا ورۆسیا ب تو ئاوایەكی پابەندی رێكەفتنان ل گەل توركیا دەربارێ رۆژهلاتێ چەمێ فەراتێ نەبوونە , وب تایبەتی خالا ڤەكشانا هێزێن یەپەگە ودووركەتنا وان ژ سینوورێ توركیا بۆ 32 كیلۆمتران.

وەزیرێ دەرڤەیێ توركیا تەكەزی ل سەر وێ چەندێ وگۆت ئەگەر خالێن رێكەفتنان ب تەمامی نەونە بجیكرن , وی دەمی توركیا نەچارە دوبارە ئێریشا توركیا بۆ سەر رۆژئاڤایێ كوردستانێ ورۆژهلاتێ چەمێ فەراتێ دەستپێ بكە .

مەولوود چاویش ئۆغلۆ گۆتژی ئەگەر ئارمانجێن توركیا ل رۆژهلاتێ چەمێ فەراتێ ب جی نەبن , توركیا وێ هەڤشێوەیێ ئۆپەراسیۆنا كانیا ئاشتیێ تەڤگەرێ بكە , ووێ ب تاك ئالی كریزێ چارەسەر بكە.

د ئۆپەراسیۆنا كانیا ئاشتیێ یا توركیا , ئارتێشا توركیا وچەكدارێن ب سەرڤە ئیریش ل دژی رۆژئاڤایێ كوردستانێ ئەنجامدان , ودئەنجامێ دە هەردو باژارێن سەرێ كانیێ وگرێ سپی وگوندەواێن هەردو باژاران ژ خەلكێ خوە یێ رەسن ڤالەبوون , ونهاژی شەر وپەڤچوون ل دەردۆرا باژارێ تل تمر بەردەوامە.

تەڤی هەبوونا رێكەفتنا , ئەمریكی – توركی , ورۆسی – توركی , وقەسەدە - رژێما ئەسەد دەربارێ راوەستانا شەر ل رۆژهلاتێ چەمێ فەراتێ , توركیا گوه نادە وان رێكەفتنان وگەفا دوبارە دەستپێكرنا ئێریشێ دكە .

وژئالیێ خوەڤە نوری بریمۆ ئەندامێ كۆمیتەیا ناڤەندی یا پارتیا دیموكراتا كوردستان سوریا دەربارێ پێشڤەچوونێن رۆژئاڤایێ كوردستانێ راگەهاند كو ئێریشا توركیا بۆ سەر رۆژئاڤایێ كوردستانێ ب رازیبوونا , ئەمریكا , رۆسیا , ورژێما ئەسەد تێ ئەنجامدان , وئەگەر رەوشا لەشكەری ل رۆژئاڤایێ كوردستانێ بەردەوام بكە , رۆژ ب رۆژ رۆژئاڤایێ كوردستانێ دكەڤە بن مەترسیەكە مەزنتر دە .

265