لڤ و تەڤگەرەكە دیپلۆماسی بەریا بداویبوونا ئاگربەستا ل رۆژئاڤایێ كوردستانێ تێ ئەنجامدان

بەریا بداویبوونا ئاگربەستا ل رۆژئاڤایێ كوردستانێ لڤ و تەڤگەرەكە دیپلۆماسی تێ ئەنجامدان، نەخاسم ناڤبەرا وەلاتێن گەرەنتۆر د چارچۆڤەیا ئاستانا دە، توركیێ ژی گەفا بەردەوامكرنەكە توند ژبۆ ئۆپەراسیۆنا خوە یا لەشكەری ددە ئەگەر خالێن رێكەفتنا وێ ب ئەمەریكایێ رە د دەما ئاگربەستێ دە نەیێن بجیكرن.

رۆژا بیست و دویێ ڤێ مەهێ سەرۆكێ توركیێ رەجەب تەیب ئەردۆگان بنیازە سەرەدانا رۆسیێ بكە، ئانگو ئەو یەك د هەمان رۆژا بداویهاتنا دەما دەستنیشانكری یا ئاگربەستێ دە تێ، ئەردۆگان ژی راگهاندبوو كو ئەوێ ل سۆتچی ب هەڤشانێ خوە یێ رۆسی فلادیمێر پووتین رە ئالیێ گرێدایی ب رۆسیا و رێژیما ئەسەد رە دەربارێ ناڤچەیا ئارام گەنگەشە بكە.

ل ئالیەكی دن، وەزوێرێ دەرڤە یێ توركیێ مەولوود چاووش ئۆگلۆ ب هەڤشانێ خوە یێ ئیرانی محەمەد جەواد زەریف رە د پەیوەندیەكە تەلەفۆنی دە رەوش و پێشهاتەیێن نها ل سووریێ گەنگەشە كرن.

د داخویانیەكە وزارەتا دەرڤە یا ئیرانێ دە هاتیە كو د پەیوەندیا ئۆگلۆ و زەریف دە رەوشا باكورێ سووریێ و پێشهاتەیێن هەرێمی هاتنە گەنگەشەكرن.


هەر د ڤێ چارچۆڤەیێ دە، ئیرۆ وەزیرێ بەرەڤانیێ یێ ئەمەریكایێ مارك ئسپر گەرەكە جڤینان ل رۆژهلاتا ناڤین دەربارێ داوین پێشهاتە لداردخە.

ئسپر د داخویانیەكێ دە راگهاندبوو كو ئەوێ بەرێ خوە بدە رۆژهلاتا ناڤین داكو سەرەدانا هێز و هەڤپارێن ناڤدەوەلەتی بكە، و داوین پێشهاتەێن گرنگ ل ناڤچەیێ دێ گەنگەشەبكە، هەروەها وێ بەرێ خوە بدە جڤینا ناتۆیێ ل بروكسلێ داكو هەژمارەك بابەتان د وێ جڤینێ دە ژی گەنگەشە بكە، و گۆت ئەو بنیازە ب هەڤشانێ خوە یێ توركی رە و هەڤشانێن دن ل بروكسلێ ژبۆ بهێزكرنا گەرەنتیا چارەسەریا سیاسی یا بەردەوامانە ژبۆ رەوشا سووریێ، بجڤە.

رۆژا پێنشەما بۆری توركیە و ئەمەریكا لسەر ئاگربەستەكە سەد و بیست دەمژمێری ل رۆژئاڤایێ كوردستانێ لهەڤكرن، كو د بەرامبەر دە دڤێ هێزێن سووریایا دیموقراتیك ب كووراهیا 32كیلۆمتەریان ژ سینووریێ توركیێ دووربكەڤن.

342