ئەمریكا پێشنیارا ناڤچەیەكە ئارام كو بەرفەرەهیا وێ 7-14 كیلۆ مترانە بۆ توركیا دكە

آرك نيوز...ژ دەما كو رەوشا سووریێ تێكچوویە , وتوركیا هەول ددە ناڤچەیەكە ئارام د ناڤا خاكا سووریێ دە ژ بۆ پاراستنا پەنابەران ئاڤا بكە , وئەمریكا رازی نەبوویە ل سەر پێشنیارا توركیا دەربارێ ئاڤاكرنا ناڤچەیا ئارام .

ل گۆری كو هاتیە راگەهاند توركیا ژ دەستپێكا سالا 2012 ان ڤە وپشتی تێكچوونا رەوشا سووریێ , ودەستپێكرنا پێلا كۆچبەری ودەربدەریێ , داخوازا ئاڤاكرنا ناڤچەیەكە ئارام د ناڤا خاكا سووریێ دە كر ئەوژی ب مەبەستا رێگریكرنێ ل كۆچبەریێ , لێ ئەمریكا ئەو پێشنیارا توركیا رەتدكر .

وپشتی دەرباسبوونا چەند سالان , وتەڤی كو نەهاتە زانین ئەمریكا رازیە یان نا , توركیا دەربارسی ناڤا خاكا سووریێ بوو , ود دەستپێكێ دە دەرباسی جەرابلۆس بوو , وپشترە دەرباسی ناڤا خاكا عەفرینا رۆژئاڤایێ كوردستانێ بوو , ئەوژی وەكە دەستپێك ژ بۆ ئاڤاكرنا ناڤچەیا ئارام د ناڤا خاكا سووریێ دە.

ود دەما نهادە توركیا هەول ددە رۆژهلاتێ چەمێ فەراتێ ژی بكە ناڤچەیەكە ئارام , لێ هینا ئەمریكا رازی نەبوویە ل سەر ئاڤاكرنا وێ ناڤچەیێ , كو وەكە هاتیە راگەهاندن كو درێژاهیا ناڤچەیا ئارام وێ تەڤایا سنوورێ سووریێ ب توركیا رە بگرە , وبەرفەرەهیا وێ ناڤچەیا ئارام وێ ناڤبەرا 30- 40 ) كیلۆ مەتری بە .

هەروەها ل گۆری زانیاریێن راگەهاندنێ ئەو ناڤچەیا ئارام وێ ل سەر سێ ناڤچەیا وەرە دابەشكرن , وئەگەر هەیە هێزێن فەرە رەگەز ژی ل وێ ناڤچەیێ هەبن , وئەو ناڤچە وێ دبن سەرپەرشتیا ئەمریكا دە بە .

وەكە بەرپرسیارێن ئەمریكی وتوركی راگەهاندنە كو هینا گۆتووبێژێ ناڤبەرا ئەمریكا وتوركیا دە دەربارێ ئاڤاكرنا ناڤچەیا ئارام ل رۆژهلاتێ فەراتێ بەردەوامن , وهینا هەردو ئالی نەگهشتنە رێكەفتنا داوی , وهەر دوه دوشەمێ جێمس جێفری شاندەیێ ئەمریكا یێ تایبەت ژ بۆ سووریێ گەهشتە توركیا , ول گەل بەرپرسیارێن توركیا ئاڤاكرنا ناڤچەیا ئارام , ونەخشەریێا باژارێ منبجێ گۆتووبێژكرن .

ل گۆری زانیاریێن تایبەت یێن كو گەهشتنە دەستێ ئاركێ , ئەمریكا پێشنیارا ئاڤاكرنا ناڤچەیەكە ئارام بۆ توركیا كریە كو بەرفەرەهیا وێ ناڤبەرا ( 7-14 ) كیلۆ مترانە , وب درێژاهیا سنوورێ توركیا وسووریێ .

وەكە شەهرەزا دبێژن كو مەبەستا سەرەكە یا ئەمریكا ژ ئاڤاكرنا ناڤچەیا ئارام , دانا دل رحەتیێ یە بۆ توركیا كو مەترسی ل سەر ئەولەهیا نەتەوی ونشتیمانیا توركیا ژ ئالیێ سووریێ ڤە دروست نابە .

دەربارێ ئاڤاكرنا ناڤچەیا ئارام بەشار ئەمین ئەندامێ پۆلیتبیرۆیا پارتیا دیموكراتا كوردستان سووریا تایبەت ژ ئاركێ رە راگەهاند ل رۆژهلاتێ چەمێ فەراتێ گوهارتنێن مەزن وێ دروست ببن , وسووریا وێ ناڤبەرا ئەمریكا , رۆسیا , توركیا , ورۆسیا وئیسرائیل دە دە وەرە دابەشكرن , ومەترسیا دوبارە بوونا ئەزموونا عەفرینێ ل جەم وەلاتیێن وێ ناڤچەیێ دروست دكە.

ود لێدوانەكە تایبەت دە ژ بۆ ئاركێ سیامەند حاجۆ سەرۆكێ شەپێلا پێشەرۆژا كورد ل سووریێ راگەهاند تو پێشكەتن د ئاڤاكرنا ناڤچەیا ئارام دە نینە , وهین د قۆناغا دەستپێكێ دەیە .

هەروەها حەسن رەمزی ئەندامێ كۆمیتەیا ناڤەندی یا پارتیا دیموكراتا كوردستان سوریا راگەهاند كو د دەما نهادە ئەمریكا وتوركیا گۆتووبێژیان دەربارێ درێژی وبەرفەرەهبوونا ناڤچەیا ئارام , وئالیێن بەشدار د رێڤەبرنا ناڤچەیا ئارام دە دكن , وهینا نەگهشتنە رێكەفتنا داوی , و دازانین كو گەفێن توركیا ل سەر رۆژهلاتێ چەمێ فەراتێ ب بێ رازیبوونا ئەمریكا ل سەر عەردێ بجه نابن , ومەبەستا توركیا ژ ڤان گەفان دەستكەڤتێن سیاسی نە د سووریێ دە , وهەروەها دەستكەڤتێن ئابووری نە د ناڤا توركیێ دە .

521