لاڤرۆف و ئۆغلۆ رەوشا سوریێ گفتوگۆكرن
ارك نیوز .. وەزارەتا دەرڤە یا روسیێ راگهاند كو دۆه دووشەمێ وەزیرێ دەرڤە یێ روسیێ ب هەڤشانێ خوە یێ توركی وەزیرێ دەرڤە یێ توركیێ رە پەیوەندیەك تەلیفۆنی ئەنجام دا و ب هوورگولی رەوشا باژارێ ئدلبێ یاكو نها تێرە دەرباس دبە گەنگەشەكرن .
وەزارەتا دەرڤە یا روسیا د داخویانیەكێ دە ئەشكەرە كر كو سێرگی لاڤرۆف وەزیرێ دەرڤە یێ روسیێ و مولود چاویش ئۆغلۆ وەزیرێ دەرڤە یێ توركیێ د وێ پەیوەندیا تەلیفۆنی دە بحسا رەوشا باژارێ ئدلب و گوندەوارێ وێ لباكورێ سوریێ كرن هەروەها تەكەزی لسەر گرنگیا هەماهەنگی و هەڤكاریا ناڤبەرا هەردوو وەلاتان دە ژبۆ راوەستاندنا شەر لباژارێ ئدلبێ و ڤەگەرا ئەولەهی و جێگری ل دەڤەرێ د ریێا جیبجیكرنا رێكەفتنا دەربارێ ئدلبێ یاكو ناڤبەرا توركیێ و روسیی دە هاتیە ئمزەكرن .
هەمان وەزارەتێ د داخویانیا خوە دە دا خویاكرن كو هەردوو وەزیران د وێ پەیوەندیا خوە دە داوین پێشهاتەیێن رەوشا سوریێ و دیتنا چارەسەریەك سیاسی ژبۆ بداویئانینا كریزا سوریێ لگۆری بریارا ئەنجومەنا ئەولەهیا ناڤدەولتی بیست و دوو وپێنجی وچار گەنگەشەكرن .
هەر لگۆری داخویانییێ دایە زانین كو لاڤرۆف و ئۆغلۆ بحسا كۆمیتەیا دستورا سوریێ یا پیشەرۆژی ژی كرنە كو هەردوو ئالی تەكەز كرنە كو پێویستە كۆمیتەیا دستوری یا سوریێ وەرە ئاڤاكرن و دەست ب كارێ خوە بكە د زوترین دەم دە داكو كریزا سوریێ بداوی وەرە و قوناغەكە نوو دەست پێبكە .
ئەنجامدانا پەیوەندیا تەلیفۆنی ناڤبەرا هەردوو وەزیرێن دەرڤە یێ روسیا و یێ توركیێ تێ د دەمەكێ دە كو بالافرێن شەر یێن روسیا ب ئاوایەكی هۆڤانە باژارێ ئدلبێ و گوندەوارێ وێ ئارمانج دكە كو د ئەنجاما وان ئێریشان دە رۆژانە ب دەهان قربانی ناڤبەرا كوشتی و بریندار دكەڤن یا هەری داوی ژی ژبەر تووندبوونا ئارمانجكرنا باژارێ معرە النعمان لگوندەوارێ ئدلبێ ژ ئالیێ روسیێ ڤە بكێمانی سیه وەلاتیێن سڤیل جانێ خوە ژ دەست دان وهەژمارەك مەزن ژی برینداربوون كو ژ ئالیێ تیما بەرەڤانیا سڤیلا سوری ژبۆ نەخوەشخانەیێ هاتن ڤەگوهەستن .
268
