ئەنەكەسێ داخوازەك بلەز ژ توركیێ و جڤاكا ناڤدەولتی دەربارێ تاوانێن عەفرینێ كر
آرك نيوز... ئه‌مینداریا گشتی یا ئەنجوومهنا نشتیمانی یا كوردی ل سووریێ, دوه 1ێ حزێرانا 2020, داخویانیه‌كه شه‌رمه‌زاریێ ده‌ربارێ تاوان و بنپێكرنێن كو ل عە‌فرینا رۆژئاڤایێ كوردستانێ روو ددن به‌لاڤ كر, تێده ژ توركیێ و جڤاكا ناڤده‌وله‌تی خوه‌ست كو داوی ب بنپێكرنان بینن.
ئه‌نەكەسێ د داخویانیا خوه ده گۆتیه: هین ژی, هن گرووپێن چه‌كدار د بنپێكرنێن خوه یێن توند ل هه‌رێمێن عە‌فرین, سه‌رێ كانیێ, و گرێ سپی ده به‌رده‌وام من, ب تایبه‌ت ل عە‌فرینا رۆژاڤایێ كوردستانێ, كو باژار و باژارۆكێن وێ راستی تاوان, و كریارێن دژی پره‌نسیپێن مافێ مرۆڤان تێن, هه‌روها دزی, ده‌سته‌سه‌ركرن, شه‌وتاندنا مال و دوكانان, كۆلاندن و تێكدانا زه‌ڤیێن زه‌یتوونان, كار ژ گوهه‌رتنا ده‌مۆغرافی, گرتنا جوانان, و ئەشكه‌نجه‌دانا وان تا ئاساتا شه‌هیدبوونێ به‌رده‌وامن.
ئه‌نەكەسێ دا زانین ژی: ناكۆكی و بهه‌ڤكه‌تنا وان گرووپان ل سه‌ر مال و مولكان, ره‌ڤاندنا وان چه‌كداران ژ ژنێن كورد ره ئەشكه‌ره كر, كو ژ بۆ گرتیگه‌هێن نه‌هێنی هاتنه برن, و ب شێوه‌یه‌كی دژی پره‌نسیپێن مرۆڤاهیێ دانووستاندن ب ژنێن كورد رە هات كرن.
ئه‌مینداریا گشتی یا ئەنەكەسێ نیشان ب وێ یه‌كێ دا: د ده‌ما كو ئەنەكەسێ ب توندی ڤان كریار و بنپێكرنێن توند و پلانكری د ده‌رمافێ گه‌لێ كورد و هه‌موو گه‌لێ هه‌رێمێ ل عەفرینێ شه‌رمه‌زار و رسوا دكه, د هه‌مان ده‌مێ ده, داخواز ژ جڤاكا ناڤده‌وله‌تی, و توركیێ دكه كو بله‌ز بنپێكرنان راوه‌ستینن, و تاوانباران سزه و دادگه‌ه بكن, هه‌روها كار ل سه‌ر ده‌رخستنا ڤان چه‌كداران ژ هه‌رێمێن نشته‌جیبوونێ و ژ باژار, باژارۆك و گوندان ده‌رخینن, و رێڤه‌به‌ریا وێ راده‌ستی وه‌لاتیێن وێ بكن.
د داویا داخویانیا خوه ده, ئە‌مینداریا گشتی یا ئەنەكەسێ بانگ ل نه‌ته‌وێن یه‌كگرتی, رێخستنێن مافێ مرۆڤان, و ئەنجوومهنا وه‌لاتێن گرێدایی ب ره‌وشێ ڤه, كر كو ل كێله‌ك گه‌لێ كورد راوه‌ستن, و ده‌رفه‌تێ ل پێش رێخستنێن مافپه‌روه‌ری یێن ناڤده‌وله‌تی, و ئاژانسێن راگهاندنا جیهانی ڤه‌كن دا كو بنپێكرنان رۆمال و به‌لگه بكن, هه‌روها كار ل سه‌ر دابینكرنا ئەوله‌هی و ئارامیا ڤان هه‌رێمان بكن.
وه‌رگه‌راندنا داخویانیێ: ش.ع
237
