ENKSê daxwaza parastina dadwereke kurd li Efrînê dike

ENKSê daxwaza parastina dadwereke kurd li Efrînê dike

May 31 2024

Encûmena Niştîmanî ya Kurdî li Sûriyê roja 30 Gulanê, binpêkirinên li Efrîna rojavayê kurdistanê û gefa kuştina dadwereke kurd bi tundî şermezar kirin.

Nivîsgeha Yasayî ya ENKSê di daxuyaniya xwe de dibêje Piştî Dadgeha Efrînê biryar derxist ku pêwîst e erebên hawirde ji malên kurdan derkevin, dadwera kurd Newroz Hiso rastî gef û binpêkirineke metirsîdar tê.

Daxuyaniyê serbar kir ku Ji ber wê yekê erebên hawirde bi piştevaniya her du grûpên Hemzat û Emşat, yên artêşa azad, bi xwepêşandanên berfireh derketin, û red kirin malên kurdan radest bikin, û biryara ku ji dadgeha ser bi Wezarata Dadperweriyê ya Hikûmeta Demkî bin pê kir, herweha siloganên li dijî dadwera kurd Newroz Hiso bilind kirin, û idî`a kirin ku ew xwediya biryarê ye, û banga kuştina wê, hevjîn û zarokên wê kirin.

Encûmena Niştîmanî ya Kurdî li Sûriyê ENKSê binpêkirinên metirsîdar derheqê dadwera kurd Newroz Hiso de bi tundî şermezar kirin û bang li aliyên berpirs û navdewletî kir ku bi rêkarên pêwîst rabin û wê biparêzin.

Nivîsgeha Yasayî ya Encûmena Niştîmanî ya Kurdî li Sûriyê daxwazên xwe di çend xalan de ragihandin ew jî ev in:

Parastina vegera kurdan bi biryareke navdewletî ji Encûmena Ewlehî û bi serpereştiya Netewên Yekgirtî.

Parastina mal û milkên sivîlên kurd li Efrîna rojavayê kurdistanê.

Parastina dadwera kurd Newroz Hiso û malbata wê û standina rêkerên pêwîst ji bo parastina wê.

Rêzgirtin li biryarên dadwerî yên ku ji dadgeha Hikûmeta Demkî derdikevin.

Serbixwebûna dadgehê û dûrxistina wê ji desthilatdariya girûpên çekdar.

Rawestandina zincîra binpêkirinên berdewam û rêbazkirî yên ji aliyên piraniya girûpên çekdar û erebên hawirde ve tên encamdan.

108