أيها السوريون أبشروا بأيام سوداء وفقرمدقع ..الميزانية سُرقت

أيها السوريون... أبشروا بأيام سوداء.. وفقر مدقع... الميزانية سرقوها قبل ان يعلنوها... ودماء اولادكم الذين يسمونهم شهداء راحت سدى. اقرأوا:

محمد عبدالله الأحمد

هل تعلم أخي المواطن أن موازنة عام2019 بسوريا رايحين فيها لنموذج الاقتصاد اللبناني المتهالك، وتم وضع بند الأدوية والمستلزمات الطبية وأدوية السرطان ضمن بند النفقات الإدارية بدل الاجتماعية لفتح باب السرقة والمناقصات الوهمية ...؟؟؟

هل تعلم أخي المواطن أن موازنتنا العامة قيمتها 9 مليار دولار قروض خارجية تم تخصيص 3 مليار دولار منها لنفقات الحكومة الإدارية (يعني تجهيز مكاتب وقرطاسية وضيافة) ...؟؟؟ أي نعم 3 مليار دولار نفقات مكاتب المسؤولين عنا بالسنة ...!!!

أنتو عم تتعاقبو على صمودكم وتضحياتكم ... وأفضل تعبير واضح وصريح وبدون تجميل للشي يلي عم تشتغل عليه الحكومة بتمرير هالموازنة هو (الحكومة رح تدفعكم دم قلبكم بعد ما قبضت ثمن دم الشهداء).

لما الجيش والشعب يقدموا تضحيات ودم لتحرير سوريا ... وتجي الحكومة تجهد لجعل سوريا دولة محتلة اقتصادياً، فهي اسمها خيانة عظمى.

لما نكون دولة ما عليها ديون، وحكومتنا تحولنا لدولة عايشة عالدين كرمال تصرف 3 مليار دولار عالمكاتب والضيافة تبعها فهي اسمها خيانة عظمى.

لما يكون عنا رؤوس أموال قوية، ومستثمرين كبار، وتحرص الحكومة على تطفيشهم والاستيلاء على ممتلكاتهم بالبلطجة تحت عنوان التنظيم، وتخصص 3 مليار دولار نفقات ادارية و3 مليار استثمار فهي اسمها خيانة عظمى.

لما يصير المواطن شحاد وتحت خط الفقر، وينتشر الفساد بالمؤسسات بذريعة عدم كفاية الرواتب، وتخصص الحكومة 3 مليار دولار نفقات للمسؤولين ومليار دولار رواتب موظفين بكل وضوح هاد بيتسمى خيانة عظمى.

لما تصير بلدنا عالأرض، والدمار بكل مكان، والبنية التحتية شبه منتهية ومدمرة وبكل القطاعات، وتخصص الحكومة 3 مليار دولار لنفقاتها الادارية وبس 100 مليون دولار لإعادة الإعمار، فهاد الولد الصغير بيشوف فيه خيانة عظمى.

باختصار:
الموازنة 9 مليار دولار قرض خارجي.
منها 3 مليار دولار استثمار.
منها 100 مليون دولار إعادة إعمار.
منها 3 مليار خدمات ودفع التزامات وخدمة ديون.
و 3 مليار دولار نفقات إدارية يا أمة الله ... تقريبا 40% من موازنة سوريا مصاريف مكاتب حكومتنا والمسؤولين وضيافة واستقبل وودع ...!!!

يا جماعة فيقو ... الحكومة مخصصة 3 مليار دولار استثمار بتجيب دخل وايرادات للدولة و3 مليار دولار مصاريف إدارية، وكل الموازنة والفوائد تبعها رح تدفعوها من جيبتكم وتعبكم وشقاكم ومستقبل اولادكم، ولسه لاحقين هدم مخالفة لجريح وتعاطف مع موظف الصحة، وبالواقع البلد كلو عم يتهدم من تحتكم ولسه ولا صوت انرفع بهالخصوص ...!!!

الاقتصاد السوري نحو دمار شامل بمؤشرات حمراء بتسارع رهيب رح ينعكس سلباً وفقراً وجهلاً وظلماً وحتى موتاً على كل واحد فينا

المقال يعبر عن رأي الكاتب

877