ترامپ : ئەمریكا ئازادە د تەعامولكرنێ دە دەربارێ پەترۆلا سووریێ

آرك نيوز...سەرۆكێ ئەمریكا دبێژە كو پەترۆلا رۆژهلاتێ چەمێ فەراتێ د دەستێ ئەمریكادەیە , وئەمریكا ئازادە د تەعامولێ دە , وپەیوەندیا تو ئالیەكی ب پەترۆلێ ڤە نینە .

دۆنالد ترامپ سەرۆكێ ئەمریكا پشتی كو ل گەل یێنز ستۆلتنبێرك ئەمیندارێ گشتی یێ هەڤپەیمانیا ناتۆ وەكە ئامادەكاری ژ بۆ لووتكەیا هەڤپەیمانیا ئەتەلەس ل باژارێ لەندەن جڤیا د لێدوانەكێ دە راگەهاند : رێخستنا تەرۆرستی یا داعشێ هەول دابوو كو بیرێن پەترۆلێ ل رۆژهلاتێ چەمێ فەراتێ كۆنترۆل بكە , لێ د دەما نهادە ئەو بیرێن پەترۆلێ د دەستێ هێزێن ئەمریكا دەنە .

هەروەها سەرۆكێ ئەمریكا گۆت : ئەز ب زەلالی دبێژم گەلەك ئالی پشتەڤانیا كۆنترۆلكرنا ئەمریكا ژ بیرێن پەترۆلێ رە دكن , وتو سەربازەكی ئەمریكی ل سەر خاكا سووریێ نەمانە ژ بلی وان سەربازێن كو بیرێن پەترۆلێ ل رۆژهلاتێ چەمێ فەراتێ دپارێزن , وپەترۆل د دەما نهادە د دەستێ ئەمریكا دەیە وئەمریكا ب ئازادانە تەعامولی ب پەترۆلێ دكە .

سەرۆكێ ئەمریكا تەكەز وگۆت كو ئەمریكا پشت ل كوردان نەكریە , وئەگەر هێزێن ئەمریكا ل سووریا نەبا , كوردان نەدكاری ب ئەولەهی وئازادانە بژین , وئەمریكا د دەما نهادەژی كار ل گەل كوردان دكە ونەفت كۆنترۆل كریە .

بەردەوام رۆسیا رەخنەیێ ل ئەمریكا دكە ودبێژە پێویستە ئەو بیرێن پەترۆلێ ڤەگەرنە بن كۆنترۆلا رژێما ئەسەد دە , وبەرپرسیارێن رۆسیا گۆتن كو ئەو ل گەل ئەمریكا د ڤێ دەربارێ دە د گۆتووبێژیان دەنە .

ئەمریكا د نەهێ جۆتمەها بووری دەست ب ڤەكشانا هێزێن ئەمریكی ژ رۆژهلاتێ چەمێ فەراتێ كر , وپشتی كو ئێریشا توركیا بۆ سەر هەردو باژارێن گرێ سپی وسەرێ كانیێ كر , وشەر وپەڤچوون ودەربدەری دروست بوو , ئیدارەیا ئەمریكا رەخنە ل بریارا ترامپ كرن وجارەكە دن ئەمریكا ژمارەیەك سەربازێن خوە ب بەهانەیا پاراستنا بیرێن پەترۆلێ ل سووریێ بجی هشتن , ود دەما نهادەژی بەردەوام ئەمریكا كاروانێن لەشكەری دشینە رۆژئاڤایێ كوردستانێ .

ل گۆری لێدوانێن بەرپرسیارێن وەزارەتا بەرەڤانیا ئەمریكا ژمارەیا سەربازێن ئەمریكی یێن كو ل رۆژهلاتێ چەمێ فەراتێ بیرێن پەترۆلێ دپارێزن ( 500 ) سەربازە .

282